Zualbawihi Video thar leh hmachhawp eng emaw zat

Lengzem khawvela kan zaithiam neih ṭhatte zinga mi Zualbawihi chuan music video thar a rawn tichhuak dawn a, hei mai bakah hian hmachhawp ṭhahnem tak a nei bawk.

Zualbawihi hian album thar a tihchhuah hnuah chawlh a la emaw tih mai turin music khawvelah a reh vang vang mai a, kumin chu a reh tluan mai dawn emaw kan tih laiin music video thar a rawn neih leh dawn ta. He hla hi a album hnuhnung zawka mi, Lungmuana nena an sak dun kha a ni a, a hla thupui hi 'Ka thlang ber che' tih hla kha a ni. Hla thar a tihchhuah rual hian Zualbawihi hian hmachhawp ṭhahnem tak a nei zui. 'Ka thlang ber che' tih hla hi Venpuia Khawlhring phuah a ni.

Tuna a hla thar kan hmuh hnu lawkah hian Zualbawihi music video thar dang kan hmuh leh thuai a rinawm. 'Rawllai ka d' tih hla kha audio recording a zo tawh a, video shooting chauh an hmabak tawh. Remchang hmasa bera shoot tur a ni. A hmain 'Zan mut chhin a har' tih hla a lo tichhuak tawh a, 'Rawl lai ka d' tih hla hi an shoot zawh lamah pawh a la che chho zel ang. Zualbawihi album pahnihna, 'Vul reng rawh' tih kha Vulmawi Awards 2016-a Best Album (Lengzem/ Lenglawng)-ah nominate a ni nghe nghe a, hei hian zai lama a duai lohzia a tarlang.

Zualbawihi hian nikum July thla khan a album pahnihna 'Vul reng rawh' tih chu a tlangzarh a, hemi hnu hian music a chawlhsan ta mai em ni tih tur hial khawpin a reh zui. Hetianga hun eng emaw chen a ngawih vang vangna chhan amah Zualbawihi chuan sawiin, class kal a ngai a, lehkha zir a ngaih avang te, chu bakah chuan zai tura hmun hrang hranga an sawm avangin a zin deuh reng a, chuvang chuan music video thar pawh a buaipui hlei thei lo a ni.