Hollywood thriller-ah Salman Khan leh Sanjay Dutt

Bollywood superstar pahnih, Salman Khan leh Sanjay Dutt te chu American thriller thar-ah an inlan dawn.

Khan leh Dutt te hi Thawhṭanni khan Saudi Arabia khawpui Riyadh-ah kalin, AIUla Studios-ah film shooting an nei ṭan a, vawiinah an nei chhunzawm ang. Bollywood-ah chauh ni loin Middle East-ah pawh an lar dun hle. An scene hi khawvel pum huapa mipui ngaihven hlawh tur leh nghawng nei thei tura siam a ni. Khan leh Dutt te hi tun hmain Saajan (1991), Chal Mere Bhai (2000), leh Yeh Hai Jalwa (2002)-ah te pawh an lo thawkdun tawh a, a changtu ni loa lan dunna pawh eng emaw zat an nei. An pahniha an inlan dunna hnuhung ber chu Ajay Devgn-a film, 'Son of Sardaar'-a ‘Po Po’tih hlaah a ni. Kum kalta khan Khan leh Dutt te hi rapper Dhillon hla ‘Old Money’ video-ah an inlan bawk.