Triau Trackx an over lo Vawiinah hla thar an tichhuak dawn

An lenrual lung duh ni lem lote'n 'I over e, in over e' an lo ti a, mahse Triau Trackx-in an chhânna chu 'Blah blah blah blah, in over fe, kan over lo' tih hi a ni. Triau Trackx hian an hla thar 'Blah blah blah blah, kan over lo' tih hla hi vawiin chhun aṭang hian YouTube-ah video leh, Zoland.in ah audio-in an tichhuak dawn.

Triau Trackx hla thar 'Blah blah blah blah, kan over lo' tih hi a music genre lamah chuan alternative grunge a ni a, Nirvana ngaina tan chuan a ngaihnawm ang. A hla thu a danglam leh viau a, tunlai tak siin, nalh taka rem chhuah a ni a, a music a ngaihnawm bawk. Hla thu bungrua pawh Mizote'n kan neih sa aiin, tunlai ṭawng tak si a tam zawk a, hei tak hi Triau Trackx danglamna leh mitena an ngaihvenna chhan niin alang. A hla thluk leh music kalhmang a tunlai a, Mizo music-a kan la uar lutuk loh an hmang nasa. He hla hi official-a kumina an hla hmasa ber a ni a, 'Chapchar Kût' tih hla kha chhuak tho mah se, tuna mi hi Triau Trackx-in official taka kumina an hla an tihchhuah awm chhun a la ni.

'Blah blah blah blah, kan over lo' tih hla hi album puitling an tihchhuah hmaa Triau Trackx hla hnuhnung ber tur a ni tawh hmel. Triau Trackx hian tunah hian album an buaipui a, an peih hnai tawh a, August thla tawp lam hi chuan tihchhuah tawh ngei an tum. An drummer Ramengmawia chuan, "Album siam hi a namai loh khawp mai a, kan zuam sual deuh niin ka inngai rum rum. Kan siam leh a nih chuan a tihdan kan thiam tawh ang a, kan awlsam deuh tawh ang chu," a ti.

"Tuna kan hla thar hi YouTube leh Zoland.in-ah te kan dah ang a, TV-ah chuan kan dah lo ang. A thlawna lak theiha kan dah tho avang hian Whatsapp-ah te inthawn darh loin, khing site aṭang khian download ngei se kan duh. Whatsapp-a kan inthawn hian a quality a chhiat phah ṭhin avangin whatsapp aṭanga lo la chhawngte'n a nih tur ang an ngaithla thei lo ṭhin. Khing site aṭang khian a thlawna download theih tho a nih dawn avangin download ngei se kan duh a ni. YouTube-ah pawh kan upload ni lo hi chu midangin upload lo se kan duh a ni," tiin Ramenga chuan a sawi.

Triau Trackx album tihchhuah turah hian hla thar pasarih vel a awm ang. Tunah hian hla paruk vel an tichhuak tawh a, chungte chu an album-ah hian a awm vek dawn a ni. Album an tichhuak thei a nih chuan Mizoram hmun hrang hrangah tour an nei mai thei. Ramengmawia chuan, "District khawpui chinah tal hi chuan tour neih theih kan châk a, kan rilru chuan kan tum. Album hi tichhuak phawt ila, chuta ṭang chuan mitena min dawnsawn dan azirin tour hi nei turah kan inruahman chhin deuh," a ti.