Hlumawii leh PBKA video peihfel

Lalremruata Project 2015 album tur buaipui chhoh mek a ni a, hla eng emaw zat peih a ni tawh a, tunkar khan Lalhlu­mawii leh PBKA te music video pawh peih­fel a ni leh ta.

Hlumawii hla hi 'Aw ropui ber' tih a ni a, Lalremruata (Mapuia) phuah a ni. Vega Records-ah recording hi tih a ni a, music hi Larry-a kutchhuak niin, video hi Milestone siam a ni. Introduction nalh leh ropui tak aṭangin he hla hi a mawi tluan a, a satu hi a thiam a, a hmun leh a hla thu a inhmeh viau bawk.

PBK Liankhuma sak hi 'Jehova' tih niin, Mapuia phuah tho a ni. Vega Records, Larry leh Milestone te kutchhuak tho niin, a hla kalhmang leh a satu a inhmehin a inrem hle. Pathian chu thlamuanna leh innghahna tlak leh awm chhun a nihzia hla a ni.

Project 2015-ah hian lenglawng leh fakna hlate dah a ni hlawm dawn a, album ṭha tak a ni ngei ang. Hlumawii leh PBKA bakah hian, Essy, Lancy, Feli Thangluah, Pensy, Bethsy, Lalramchhana, VLA, Lallawmawma, Sawmtea, Manuna of Hard Ray, Ramtiami teho an zai dawn a ni. Kumin chawhnu lamah tihchhuah tum a ni.