RTC Lalduhawmi 3D Animation a buaipui mek

Mizo hmeichhe zaithiamte zinga thawm nei lian leh hlawhtling RTC Lalduhawmi chuan naupang leh tleirawl lama rawng a bawlna huang a zauh zel a, tunah hian 3D Animation film a buaipui mek.

RTC Lalduhawmi hian naupang leh tleirawl lamah rawngbawlna a kalpui zel a, chutihrual chuan ṭhalai, hmeichhia leh kohhranpuiah pawh sawmna a dawngin rawng a bawl zel tho. Hetianga rawng a bawlnaah hian tunlai hian 3D animation film an buaipui mek a, Mizorama a hmasa ber tur a ni. Maduhi hian, "Kumin kum tir aṭanga kan buaipui tawh kha a ni a, a buaithlak zek a, animation hi a lo harsa khawp mai," a ti. ThlÍmna do zawh a pawimawhzia lantirna tur film a ni a, tunah hian episode pakhatna tur chauh an la buaipui rih a, hei hi minute 30 vel awh tur a ni ang. Tun October thla hian an tichhuak hman mai thei.

Mizo hmeichhe zinga lar rei leh huhang ngah pawl RTC Lalduhawmi hian kum 1980 aṭang khan Zo rimawi khawvelah hriatlar a hlawh ṭan a, mahse hemi kum aṭang chauha zai leh hla phuah a ni lo, kum 3 a nih lai aṭangin hla a lo phuah tawh ṭhin. Kum 1980 khan radio artist a ni a, 'Kan au che nunhlui' tih te, 'Chawngtinleri tual lenna' tih hlate kha radio-ah thunin thlan a hlawh hle.

Kum 1984 khan a album hmasa ber pahnih - 'Madin' tih leh 'Mi lungleng thei tak a ni' tihte a tichhuak a, hralh a kal hle. Hetih hunlaia album tihchhuah dan leh zaithiamte sum lakluh chungchang zawhna chu RTC hian chh‚ngin, "A tirah chuan album ka siam manah Rs. 3,000 min pe a, chu bakah, album (cassette album) pakhat an hralh chhuah zelah ro≠yalty Rs. 3 zel ka dawng ṭhin," a ti a, royalty aṭang hian Rs. 10,000 chuang lai sum a lalut. "A hnua album ka siamah kha chuan album siam manah Rs. 5,000 min pe a, kan album hralh a kal dan ang zelin pawisa hi an san
ṭhin," a ti. Lengzem album pali a siam hman.

Hetih hunlai hian Maduhi hi Ramthar Veng, Aizawlah a awm tam ber a, an inpui ber a ni. Kum 1985 khan Ramthar Veng Kohhranah Lalthlamuana, Evangelistic Team ten camping an nei a, chutah chuan lutin piantharna a chang ta a ni. A pianthar hnua a album tihchhuah hmasak ber chu 'Van Indona' kha a ni a, kum 1992 khan a tichhuak. Gospel album ṭhahnem tak a tichhuak zui a, album 10 chuang lai a siam tawh a ni. Tunah tak chuan Seling-ah a khawsa mek.

A pianthar hnu hian kawng hrang hrangah rawng hna a thawk ṭhin. Lehkhabu leh naupang film-te siamin a tichhuak. Hmun hrang hrangah thusawi tura sawm a ni fo a, tun Pathiannia Presbyterian Kohhran Senior Dept Inkhawmpui turah Bungtlang, Serchhip District-ah speaker a ni ang.