Wilderness nasa takin a chereu

Current Biology chanchinbuin a tarlan dan chuan khawvel pumah Wilderness an tih ang chu nasa takin a kiam.

Wilderness hi environment huang chhungah chuan biology leh ecology lama hmun, mihringina an la pal darh miah lo sawina a ni. Hetiang hmun hi kum 1990 chho vel nena khaikhinin tunah chuan nasa takin a tlem tawh. Kum 1990-a report nena khaikhinin wilderness hi za zela 10 ngawtin a tlem tawh zawk a, chu chu square km maktaduai 3.3 zeta zau a ni. Alaska state tiat zet tihna a ni a, Amazon ngawpui zatve zet tluk a ni.

Unversity of Queensland, Australia leh Wildlife Conservation Society, New York-a mi, James Watson chuan wilderness hi khawvel ram tam tak hian an ngaih thah hle tih a sawi a, environment policy chungchangah pawh sawi chhuah a hlawh kh‚t hle a ti. "Hetiang hmun humhalhna tura ruahmanna siam engmah a awm lo a, chuvang chuan mihring hmasawn zel tuar nasa bertu a ni," a ti.

Khawvel pumah hian wilderness an tih ang hi square km maktaduai 30.1 tunah hian a la awm a, chu chu khawvel pum zau zawng aṭanga chhutin zaa 20 vel a ni. Wilderness tam ber hi North America, North Asia, North Africa leh Australia-ah te a awm. Khawvelina wilderness a hloh zinga tam ber hi South America-ah a ni. South America-a wilderness za zela 30 chu mihringten an pal darh tawh a, Africa-a za zela 14 chu pal darh a ni tawh bawk.

Watson-a hian UN leh environment kaihhnawih pawlte hian wilderness pawimawhna an sawi loh mai bakah an ngaihthah a ni a ti. Environment humhalh kawngah te, sik leh sa inthlak nasa tiziaawm tura beihna kawngahte wilderness chereu hi chhiatna lian tak leh kan hlawhchhamna lian tak a ni a ti bawk.