Hlumawii hla thar 'Kei kher min thlang si'

Mizo Idol-in Mizo Idol intihsiakna neih mek laiin, contestant-te tiṭangtu ni âwm tak turin music video thar a tichhuak. Lalhlumawii music video thar hi zanin hian Zonet-ah dar 6:50 velah tihchhuah a ni ang.

Lalhlumawii music video thar hi 'Kei kher min thlang si' tih a ni a, Mizo Idol-a amah kher an thlan vang ni loin, Pathian hian a rawngbawl turten khawvela mi hausa leh thiltithei chauh thlang loin, mi mawl leh thiamna nei lote pawh a thlang ṭhin a ni, tih hla a ni. He music video hi Hlumawii music video pathumna tur a ni.

"Ka hla thar hi keimah nen a inhmeh ka ti lutuk a, ka duh tawp a ni mai. A hla thu a ṭha a, cool deuh dap a ni a, sak a nuam ka ti hle," a ti. Hlumawii hian 'Lei leh van siamtu' tih hla kha a hlawhtlinpui hle a, tuna mi pawh hi a hlawhtlinpui leh a rinawm viau. 'Kei kher min thlang si' tih hla hi Hnahthiala mi, Lalrindika phuah a ni.

"Hmachhawp ka la nei nual a, Pu Mapuia hla bakah Pu John-a hla buatsaih mek ka nei bawk. Tun thla chhung hian shooting kan neih theih ka beisei," a ti. "Music video mal bakah hian album ka sual ve ṭan deuh bawk a, Pathianin rem a tih a, min pui duhte an awm chuan kumin chhunga tihchhuah theih chu ka duh khawp mai. Album tur atan hian sound track kan buaipui mek chauh a, a vai vai hi chuan video-a kan tih theih a rinawm loh...sponsorship vel hi ka zawng ngam chiah si lo a, sponsor chu hmu ila a vaia siam pawh a chakawm nen... a ṭhen audio leh a ṭhen video-in siam ka tum ang," tiin Hlumawii hian a album buatsaih chungchang a sawi.

Idol intihsiakna a kal chho mek a, Hlumawii lung pawh a tileng hle. An hunlai nen khan a khaikhin viau a niang, "An thiam hlawm khawp mai.... keini tih kum ai chuan an thiam zawkin ka hria... an thiam hlawm khawp mai," a ti. Mizo Idol-a a tel chuan a zaiah hlawkna tam tak a pek mai bakah, Idol hnu thleng hian hma a la sawn tial tial niin a inhria a, "Ka hlawkpui a, hma ka sawn a, chutiang chuan ka ṭhiante pawhin an ngai vek a ni," a ti.