MDM Annual General Assembly Vawi 1na Zaithiamte hnenah nuai 10 an sem tawh
Inrinni khan Music Domain Mizoram (MDM) chuan I&PR Conference Hall, Aizawlah Annual General Assembly vawi khatna an hmang a, Mizoram hmun hrang hrang aṭangin zaithiamte an fuankhawm ṭha hle.
MDM Annual General Assembly-ah hian Alex Lalchhuankima, MDM General Secretary chuan report pein, tunah hian MDM Library chu Cable TV hrang hrang 73 ten an hmang mek a, heng Cable TV, man chawia MDM subscribe-tute hian thla tin MDM aṭangin Music Video thar ber ber an nei ṭhin. Cable TV-te hi subscriber an neih dan azirin category hrang hrang - A, B, C, D+ leh D ah te ṭhen hran an ni a, Category A in Rs. 1000, category hniam ber D Category-in thla tin Rs. 300 chawiin MDM hi an Subscribe mek a ni.
MDM Treasurer Gracy VL Pachuau chuan, MDM a Music Video in-Registered-te hnenah, MDM Subscribe-tu Cable TV hrang hranga peak hour chhunga an zai tihchhuah hnem azirin, Zaithiamten MDM aṭangin Lawmman an dawng ṭhin tih a sawi a, Kum 2014-2015 chhung khan MDM-a Music Video in-Registered-te hnenah Rs. 10,00,000 chuang an semchhuak tawh tih report-in, MD- a inziak lutte damlohna avanga damdawi-ina an awmin, Mizoram chhung damdawi-ina awmte Rs. 2000 leh State pawna mite Rs. 3000-in MDM Health Assistance aṭangin damlote kan an ni ṭhin tih a tarlang. Health Assistance aṭang hian Rs. 25,000 chuang pek chhuah a nih tawh thu a tarlang bawk.
MDM Library Rules & Regulation an ennawn bawk a, tam tak an ennawn zingah, MDM Member Rules & Regulations zawm lote hremna dan siamin, a zawm lote chu thla thum chhung MDM Library hmangtu Cable TV te aṭanga an zai tihchhuah loh nise an ti. Hei bakah hian zaithiam leh Producer Library dang aṭanga MDM Library-a in-register turte chuan, Library danga an Music Video dah luh tawh zawng zawngte la chhuak vekin, MDM Library-ah an inziak lut chauh tur a ni tih te an rel bawk.