Andrew-a Nunna Thar Music video a hnai Mi dangte tana rawngbawlna

He hla hi pawisa hmuh nan kan phal lo tawp a..a duh apiang chuan min dil thei ang Nunna Thar Project

Hun eng emaw chen an buaipui hnuah tunah chuan Andrew Laltlankima chuan Nunna Thar music video chu a zo a, a peihfel a, a tichhuak ta. He music video hi mite tana rawngbawlna tur a ni a, chuvang chuan YouTube lamah a thlawna en theihin dah chhuah a ni a, cable TV lamah pawh an lo tichhuak duh a nih chuan a thlawnin an tichhuak thei dawn a ni.

Nunna Thar hla hi Andrew-a phuah a ni a, he hla hi mi pakhat nuna thil thleng tak tak behchhana phuah a nih avangin belhchian a dawl hle ang. Nuna harsatna leh beidawnna tawkte tan chona ṭha tak hla a ni ang a, beiseina thar petu a nih ngei a beiseiawm viau. Mi pakhat hian ngaihzawng a nei a, a hmangaih em em a, duh tinrengin a duh a ni. Mahse a hmangaih chuan a hmangaihna a hlan chu a lo hnar tlat mai si. Chu chuan hmangaihtu thinlung nasa takin a tina a, a tihrehawm a, nun kawng duhawm lo tak a zawh phah hial a ni. Ruihhlo bawihah a tang a, nun kawng chhe zawk lam hlir a zawh hnuin, Pathianah nunna thar a chhar a, nun kawng dik a zawhna chanchin hla a ni.

Andrew chuan, "He hlaa kan duh ber leh beisei ber chu he hla kaltlang hian mi pakhat talin beiseina thar nei se kan duh a ni. Nun beidawnga awm, nun pawh chak tawh lo pakhat talin beiseina thar neiin, nun êng nei se kan duh ber a, chutianga hlawkpui pakhat tal an lo awm chuan keini chuan a hlawhtling em emah kan ngai ang," a ti. "He music video kaltlang hian Pathian hian ropuina chang se, keini lam ni loin, Pathian chauh zawk lo ropui ber se kan duh a ni," a ti bawk.

He hla hi Nunna Thar Project-in an siam leh produce a ni a, Nunna Thar Project-te chuan, "He hla hi pawisa hmuh nan kan phal lo tawp a ni mai. Aizawl khaw pawna cable TV neitute pawhin an chhuah duh a nih chuan min rawn dil se, a thlawnin kan thawn zel ang," a ti. YouTube-ah an dah ang a, a hranpaa duh chuan anmahni dil mai tur a ni. 'Nunna thar' hi feature film-a buaipui mek a ni bawk a, hemi tur hian Mapuia, Leitlang Picture te nen pawh thawhho an tum.

Kum 2013 daih tawh khan 'A kut phah ropui chhungah' tih hla a tichhuak a, khami hnua Andrew-a music video neih leh hmasak ber a ni a, a kar a hla dalh dalh khawp mai. Mahse tuna mi hi hla ṭha, awmze nei leh mite chophur thei tur a ni thung.

Andrew-a hian hla dang a buaipui leh mek bawk a, mahse hei hi kuminah a tihchhuah hman loh a rinawm mah zawk. A hla buatsaih ṭan leh mek hi 'Famkim lohna khawvel' tih a ni a, kohhran ṭhalai pawl chhunga rawngbawlna hrang hranga innghirnghona awm ve fo ṭhin, beidawnna awm ve fo ṭhin aṭanga chakna thar nei tur ngenna leh sawmna hla a ni. "Kohhran ṭhalai pawl rawngbawlna chhungah hian ṭhahnemngaih dan inang lo leh, inrem lohna awm ve fo avangin inhmang peih tawh lo leh beidawng tam tak an awm a, chung mite fuihna hla, Krista tana êng chhuak zel tura fuihna hla a ni," tiin Andrew chuan a sawi.