Box Office Monster Hunter-in lawm a hlawh ber
North America Box office-ah chuan Monster Hunter hralh a kal ber a, pakhatna a ni. The Croods: A New Age chu pahnihna ni ve thungin Fatale chu pathumna a ni.
Monster Hunter, China-ah a hnawngnaa US-ah lawmin a awm
Milla Jovovich channa Monster Hunter chu China-in khap mah se US-ah erawh a che ṭha angreng hle. Hrileng kara tlangzarh a ni a, theatre 2k-ah pawh an chhuah tling lo. Chuti chung chuan $maktaduai 2 chuang a lalut thei a ni.
December 18 khan US-ah tlanzarh a ni a, theatre 1,736 aṭangin $2,201,269 a lalut. Monster Hunter hi video game a awm hmasaa, chumi behchhana siam chu niin US Army Ranger Captain Artemis kaihhruaina hnuaiah sakawlh lian tak tak an beihna lam film a ni a, monster film hmuhnawm tak chu a ni ngei tih a chiang.
December 4 khan China-ah an tlangzarh hmasaa, mahse he film-a an ṭawngkam pakhat chu Chinese hmuhsitna nia an ngaih avangin an chhuah tak tak hmain China chuan an ramah he film hi chhuah a khap lehnghal a, chuti chung chuan China Box office-ah tlangzarh karah pangana a la ni pha tho a ni.
Monster Hunter hian US ni lo ram dang aṭangin $4,800,000 a hailut tawh bawk a, khawvel pumah $7,001,269 a lalut tawh. Film siamna atan $mtd 60 vel an seng nia chhut niin hemi a nih avang hian an budget erawh an la pha lo nasa hle.
Pahnihna The Croods:
A New Age, Pathumna Fatale
The Croods: A New Age chu kar eng maw zat US Box Office-a sum lalut tam ber a nih hnuah Monster Hunter-in a nek chhuak ta a, pahnihna a ni ve thung. Theatre 1,906 aṭangin $2,079,235 a lalut.
Zirtawpni liam taa tlangzarh thriller film Fatale chu pathumna a ni ve thung.
Hilary Swank leh Michael Ealy-te channa film hi theatre 1,107-ah pek chhuah a ni a, $918,112 a lalut a ni.
Film thar a vang
Box Office top 10-ah Monter Hunter leh Fatale tih loh chu film thar dang a awm meuh lo. Box Office Mojo-in chart-a a tihlan chianah heng film pahnih bakah hian film thar Parallel Policy chu 27-na a ni a, Hunter Hunter chu 23-na a ni bawk.
Box Office Top 10:-
1 Monster Hunter $2,201,269
2 The Croods: A New Age $2,079,235
3 Fatale $918,112
4 Elf (2020 Re-release) $365,000
5 Half Brothers $271,605
6 The Polar Express (2020 Re-release) $231,000
7 Freaky $174,905
8 The War with Grandpa $170,816
9 National Lampoon's Christmas Vacation (2020 Re-release) $166,000
10 How the Grinch Stole Christmas (2020 Re-release) $130,000