Beisei pha lo Wonder Woman 1984

Gal Gadot channa Wonder Woman 1984 chu ram 32-ah tlangzarh a ni ta a, tlangzarh karah $makatduai 38.5 vel a lalut.

Hrileng karah eng ang nge film siamtute'n an beisei hriatthiam har hle mah se China leh Japan-ahte chuan beisei a pha lo hle niin media hrang hrang chuan an tarlang.

Wonder Woman chhunzawmna hian China-ah chuan $mtd 18.8 a hmu chhuak a, Taiwan-ah $mtd 2 lalutin Japan-ah $mtd 1.6 a lalut bawk. Europe ram hrang hrangah hripui leng avanga inkharkhipna dan thar kalpui leh a ni chu Wonder Woman hian a tuar ta niin a lang a, chutiang chu ni lo se hei ai hian a sum lakluh hi a tam zawk hle ang tih a rin thiam theih.

Tunkar chhung hian ram dang eng emaw zatah tlangzarh a la ni dawn a, theatre-a pek chhuah tura tlangzarh a nih dawn bakah HBO Max streaming service-ah pek chhuah a ni dawn bawk a, a sum lakluh chu a pun ve leh nual erawh a rinawm a ni.

China Box Office-ah hian WW 1984 hi pakhatna a ni pha lo a, Chinese action film 'The Rescue' chuan $mtd 34 lai a lalut a, Wonder Woman hian a zahve dawn a pha ve ṭawk chauh a ni. Chutihrual erawh chuan kar tawp liam ta kha pre-Christmas weekend-a China Box Office-a sum lengvak tlem ṭum a ni a, kum 2014 hnu lama sum tlem ber ṭum a ni.