Streaming Platform leh Mizo zaithiamte

Khawvel a changkang zel a, tunhma ang khan mi tam tak chuan Mp3 an download tawh meuh lo a, streaming platform hrang hrang aṭangin awlsam takin internet awmna hmunah chuan an hla duh kan hmet chhuak tawh mai ṭhin. 

YouTube hi a awlsam a, mi tam berin hla ngaihthlakna atana an hman ṭangkai pawh a ni tih a chiang. Sum hmuhna atan pawh kan zaithiam zingah hmang an tam tawh hle a ni. YouTube hian tunhnaiah YouTube music an rawn ti thar a, hei pawh hi a lar leh mek a ni. Chutih rual chuan audio chauh ngaihthlakna atana streaming platform ṭha tak, khawvel huap pawha lar tak Spotify-ah hian Mizo zaithiamte hian an hla hi an dah nual tawh tih i hria em? An hla stream nei tam tak takte pawh a awm leh tawh a, ṭhenkhat chuan sum lakluhna atan an hmang leh ṭan tawh.

Apple music, Amazon leh streaming service hrang hrangah Mizo hla ngaihthlak tur a awm nual tawh a, phone-a audio file kawl kher ngai loin internet kaltlangin awlsam takin a ngaihthlak theih a, chu a chhapah an hla i stream hmang khan kan zaithiamte'n hlawkna an lo tel ve thei zel bawk a, kan tualchhung artist-te tana mipui nawlpuiin awlsam taka eng emaw kan tihsak ve theihna pawh a ni awm e.  

YouTube chu sawi loha lum a ni tawh a, Mizo artist million viewer nei chin ringawt pawh chhiar sen an ni tawh lo.

Spotify lamah pawh hian nuai chuang fe stream hlawh an lo awm leh nual tawh. Kan zaithiam eng emaw zat hi verfied artist an ni leh tawh bawk.

G'nie ft Hriatrengi 'UNI' kha mi nuai hnih chuangin an stream tawh a, thla khatah mi 6,439-in an ngaithla ziah ang a ni. G'nie hla dang K.O.N.E te pawh kha sang thum chuangin an stream tawh.

Francis-a hla 'Thinlung Khawngaihthlak' khan stream nuai 1.85 lai a nei tawh. Thla khatah mi 2,980 ang vel tal chuan an stream ṭhin anga chhut a ni.  

Jaui hi a hla ho stream nasat pawl tak a ni bawk a, 'I hlutna' khan stream 98k chuang a nei tawh a, I tan chauh pawhin 36k chuang a nei tawh. A hla cover dang pawh sing chuang ve ve stream a ni tawh a, Jaui hian sum pawh Spotify aṭang hian a lalut tawh tih Vanglaini a hrilh.

Daduhi album pathum vel ngaihthlak tur a awm bawk a, stream pawh sing chuang a nei fur tawh.

Lalnunsanga Phek 35-na album pawh kha a vaiin ngaihthlak tur a awm a, Fiona Pachuau 'Min Chawlh tir Tawh' album pawh kha ngaihthlak theihin a awm a ni. Hlimhlimi, Rpa Ralte, Lalremruata, Grace Lalchhanhimi leh zaithiam dang eng emaw zatin heng streaming platform hrang hrangah hian an hla an dahlut tawh a, Avora Records, Dream Hunter leh band dang tam tak zai Spotify-ah hian a awm tawh bawk.