Robin Thicke A album hnuhnung ber an hralh chhia

Blurred Lines hla a hit ropui a, Pharrell Williams nen pawn sum tam tak an lakluh phah a ni. Hemi hnu hian Robin Rhicke chuan album a siam leh a, a album siam kha tun thlengin copy sing nga pawh an la hralh tling lo!

Robin Thicke hian kum 2013 khan Blurred Lines album a tichhuak a, a hlawhtling hle. Blurred Lines album hming put chhan hla, Pharrell Williams nena an sak, Blurred Lines hla phei kha chuan a hunlaia khawvel hmun hrang hrang zaitir hlawh ber zinga mi a ni. He hla avang hian Billboard Music Awards-ah pawh award pali lai a la nghe nghe. A lar vanglai tak hian album dang 'Paula' a tichhuak leh a, hei erawh sawizui tlak loh khawpa album hralh kal lo a ni.

Blurred Lines a hlawhtlinpui em em hnu lawkah a nupui Paula nen an inṭhen a, a nupui hian a chhuahsan. Robin Thicke rilru a na hle a, album a siam leh tur pawh a nupui Paula tl‚n kohna tur a nih thu a chham chhuak fo a nih kha. Tichuan, thawm nei lian tak chung siin album 'Paula' chu a tichhuak a, mahse a ropui lo, a ropui hlawl lo.

A album vuak hot nan hian a hmain a album-a a hla chhuan ber 'Get her back' hla, a nupui kohna hla ngei mai chu a malin a tichhuak phawt a, eng ruai a ang lo hle. A nupui a kohkir loh mai bakah Billboard Hot 100-ah 82-na a luah pha hram chauh. A album chu a hnuah, kum 2014 July thla khan a tichhuak a ropui lo hle. Zaithiam lar ropui ni mek, album hlawhtling leh hla hlawhtling tak nei mek zinga amah anga che chhia an tam lo.

Release aṭanga chawlhkar khat a hman hmasak ber chhungin copy 24,000 a hralh a, Billboard Hot 200-ah pakuana chu a rawn kai ve mial. A leh pekah chuan copy 6,000 chauh a hralh tawh a, a tlahniam nasa hle a ni. UK leh ram dangah phei chuan zahthlak khawpin a hralh tlem. UK-ah chuan an zawrh chhuah chawlhkar hmasa berah copy 530 chauh a hralh a, Canada-ah chuan 550 hralhin, Australia-ah phei chuan copy 158 chiah a hralh thei! Hetia a hlawhchham mai bakah hian a nupui lamah pawh a hlawhchham a, an inṭhen zui ta zel a ni.