Lalhlumawii A dai ngai loh ramah min chêntir dawn!

Mizo Idol 2013-a pahnihna, Lalhlumawii chuan a dai ngai loh ram min hriattir a tum a ni chÍk a niang, "Ka dai ngai loh hmun nuam" tih hla chu music video-a siamin a peih a, MDM Library-ah a dah chhuak leh ta.

'Ka dai ngai loh hmun nuam' tih hla hi Kima Chhangte phuah a ni a, Milestone Pictures-in a video hi an khawih thung a, Foster Records-a a record a ni. Hlumawii chuan, "A music video hi simple deuh, hmuh nuam leh en nuam tak tura siam a ni," a ti. He music video siam tur hian a inbuatsaih ṭha a, a duh ang thlap a ni a, en a chakawm viau.

Hlumawii hian music video a tihchhuah bakah a tihchhuah leh hmabak chu album a ni tawh thung. A album thar tur hi a nghahhlelhawm hle. Chutihrual chuan programme a ngah khawp mai a, mahse a programme neih hian a album tihchhuah hun tura a ruahman a bawhbuai lo ang. Hlumawii hian September 24 hian a album tihchhuah a tum.

A album hming tur hi 'Lei leh van siamtu' a ni a, a album hming put chhan ber hla hi music video-a siamin a tihchhuah tawh kha a ni a, Ṭhazual chart-ah pawh pakhatnate a lo hauh tawh a ni. A album turah hian hla 14 dah a tum a, audio-in hla paruk leh video-in hla 8 a awm ang. A hla neih sa, a tihchhuah tawh pali pawh he album-ah hian a dah vek ang. A album thar tura hla zingah hian Kristian Hla Bua mite pawh a awm dawn.

Album tichhuak turin inbuatsaihna a kal mek a, programme dang neuh neuh a ngah hle bawk. "Zaia chhuahna tur ka ngah ang reng a, Pathian malsawmna ka dawng hle. Khawpui chhungah zaina tur hmachhawp a awm nual bakah, Anthurium Festival neih turah pawh hian zai tura sawm kan ni ve bawk a, ka inbuatsaih mek," a ti.