Fashion Fiesta Nihliap
Kum dang ang lo takin fur ruahtui tlak hun ni tawh chiah lo mah se, tunlai boruak zet chu inchei thiam a har ngei mai. Inchei lum viau a, thawmhnaw lum lam hak chhuah lahin chhun lamah ni a eng leh uarh a, kawr ban bul leh themhlem deuh hlek nena chhuah lahin ruahin min nan zawr leh hnap a, inchei thiam a har khawp mai. Chuvangin, mi hmuha lum lutuk lo leh themhlem lutuk lo inbel duh tan chuan inchei thiam a ngai dawn hle a, abikin kalna apiangah ruah laka min humhim thei tur nihliap ken zel mai a finthlak lai tak a ni. Khua a lo ṭha deuh anih pawn nisa laka min humhimtu ṭha tak pakhat a nih tho avangin a remchang hlei hlei.
Nihliap hi chhung tinin kan kawl ṭheuh awm e. Kan nuna pawimawh deuh si, kan chÓk loh pawl tak pawh a ni ngei ang. Ruah laka min humhim a, nisa laka min puitu anga kan ngaihna piah lamah hian History thui tak nei a ni tih hi mi tam zawkin kan hre kher awm love. Tunlai khawvel changkang chho zelah nihliap ni satliah tawh loin incheina pakhata chhiar a nih chhoh tak hnu phei hi chuan, a hlutna a zualin, designers tam zawk ten umbrella line changtlung tak tak siamin, milar leh hausa te chuan designers siam kher beiseiin a market pawh a rawn tihsan phah hle a ni.
Kan hriat theih china nihliap hmasa ber chu t˚m hnah aṭanga siam, tlema neinung deuh te leh mi bikte tana siam a ni a. Hun a lo kal zel a, khawvel changkannain mihringte thiamna nasa tak min pek ang zelin a siamṭhat lamah pawh kan ṭhang chho ta zel a ni. Sap hoina Umbrella an tih mai hi Parasol tih tea lam kawp a ni fo
ṭhin. A nihna takah chuan Mizote hian Nihliap tih hian kan khaikhawm mai a, Parasol hi Nihliap tih deuh bik niin Umbrella bik hi ruah laka inhumhimna tura duan zawk tak chu a ni. Hmanlai Egypt lalte zingah kum 3000 chuang liam ta khan Nihliap hmasa ber chu hmuh niin, an lalte leh an mi pawimawhte lalzia entirna leh nisa laka inhumhimna atan an lo hmang daih tawh a, abikin hmeichhia vun rawng d‚ng takte kha hmelṭha tia sawi ṭhin an nih avangin nisa laka inhumhim dan kha an lo hmuchhuak hma ni awm tak a ni.
Kum zabi 11 alo nih meuh chuan China khawmualpuiah savuna siam Nihliap chu a vawi khatna atan to taka hralh chhuah a ni a, hemi hma zawng hian an nihliap kha waterproof a ni ngai lem lo. Chutia ruah laka vawng him thei tur an hmuhchhuah tak hnu chuan vawiin thleng hian China chu Nihliap siamchhuaktu lian ber an ni ta reng a ni. A tir lama China a lar chhoh viau lai khan Europe khawmualpui lamah erawh Nihliap pangngai waterproof ni lo chu Greece leh Rome khawpuia mi neinung leh hausa deuhten intihhmuhin an uar chho hle. Amaherawhchu heng hunlai hian hmeichhe incheina anga ngaih anih avangin mipain khum enah an en ngai lo. Heng hunlai hian a tlangpuiin an Nihliap chu chei deuh chei chuai, par deuh te leh a tlang kir deuh bip bep te ala ni hrim hrim a, mipa tan khum ena han en chi a ni lo hrim hrim. Kum zabi 16-na chhoah England ramah chuan incheina pawimawh tak pakhat ni chhoin, kum zabi 18-na alo inherchhuah meuh chuan English pa lar tak Jonas Hanway chuan tlema design mawlmang leh nghet charh mai nihliap mipui zingah leh thiltih pawimawhah te rawn hawl chhuakin, mi tam zawkin a tir lam chuan mak ti viau mah se a hnu rei vak lovah English khua leh tuite chuan Nihliap chu hmeichhe incheina ni satliah tawh lovin mi nawlpui tana hman theih turin an pawm ta a ni. Chuta ṭang chuan Europe khawmualpui kangkaiin khawvel hmun hrang hrangah an lo uar chho ta hle a ni.
Nihliap chi hrang hrang ṭangkai leh maksak pui pui te pawh siam chhuah zel a ni a, chung zinga langsar zual deuh deuhte chu Classic Umbrella an tih mai, a design chhuak hmasa simple tawp ang chi ho te, Automatic Umbrella an tih, a hmawra hmeha parh thei ang chi te, a tlangpuiin heng ho ang hi Bag chhunga han ah mai theih tura folding-a siam a ni tlangpui. Pocket Compact Umbrella, tÍ fel ‚t mai, z‚ng leh ken awlsam tak mai, pawh ziha inchi 9 vel leka seiho hi ruah sur nasatah chuan a ṭangkai lutuk lo fo ṭhin, abikin thli a tam phei chuan. Bubble Umbrella an tih mai Nihliap fim vek ho hi a kengtu tana ṭangkai tura siam a ni a, eng anga ruah sur nasaah pawh awlsam taka thil hmuh theihna tura duan a ni. High Wind Umbrella, heng nihliap ho hi abik taka ruah leh thli nasat ṭuma hman atana duan a ni a, a khauh ṭha bik a, a kuang a tam bikin darkar khata mel 70 a chak thli pawhina a chhem chhiat mai theih loh tura duan a ni.
Nihliap History hrim hrim ziah duh vanga heng chanchin hi sawi ni lovin tunlai khua leh boruak nena inmil chu thuhran, secondhand nihliap ṭha tak tak kan hmuh tak hnu phei hi chuan ruah leh nisa hliaptu mai ni lovin kan incheina pakhat (fashion), ṭangkai tak ni chho mekin kan nihliap khum leh ken azir ten mi tam zawk hi chu kan fashion taste a hriat theih tlangpui. Chuvangin, i thawmhnaw leh i inchei dan milin nihliap mawi tak i lo khum dawn nia.
Tluangpui Hmar
Instructress
Vakiria Institute of Fashion Technology