Sofia Vergara TV actress zingah sum a lalut hnem ber
Forbes chuan TV actress zinga sum lalut hnem ber a tarlang leh tawh a, sum lalut hnem ber hi Colombian chhe lo, Sofia Vergara a ni. TV aṭanga sum lalut hnem hmeichhia tarlana a sang 15 te sum lakluh zawng zawng belhkhawm hi USD mtd 208.5 lai a tling. Top Ten-ah hian Indian actress Priyanka Chopra pawh a lang.
Sofia Vergara hian TV aṭangin sum a lalut hnem tawh hle a, tun hi a zawna pakhatnaa vawi nga a awmna a ni ta. Vergara hian June 1, 2015 aṭanga July 1, 2016 inkarah khan USD mtd 43 zet a hailut. A sum lakluh hi management fee leh chhiah a pek hmaa mi a ni a, a hlep chhuah dik tak erawh hei hian a tlem zawk. Vergara hian TV aṭang chauh ni loin sum a lalut hnem a, endorsement hrang hrang a nei a, chung zingah chuan Head & Shoulders leh CoverGirl te hi a sum lakluhna lian a ni.
Big Bang Theory star, Kaley Cuoco chu sum lalut hnem ber pahnihna a ni. The Big Bang Theory aṭang ringawt pawh hian a hlawh hnem a, episode pakhat a chan apiangin USD mtd 1 zet a hlawh. Cuoco hian thla 12 chhungin USD mtd 24.5 lai a thawk chhuak hman a, pakhatna, Vergara nen erawh an sum lakluh a inthlau hle.
The Mindy Project star Mindy Kaling hian USD mtd 15 lalutin sum lalut hnem pathumna a ni. TV lam aṭanga sum a lakluh bakah hian lehkhabu ziak tura deal a neih aṭangin sum a lalut hnem hle bawk. Essay hrang hrang ziakna bu a tihchhuah tur atan hian USD mtd 7 chuang zet an pe.
Ellen Pompeo hian Grey's Anatomy hi a hlawkpui tih a chiang hle a, sum lalut hnem palinaah a lang pha. Pompeo hian thla 12 chhungin USD mtd 14.5 lai a lalut. Law and Order SVU-a mi Mariska Hargitay nen Pompeo te sum lakluh hi a inzat. Hargitay pawh hian USD mtd 14.5 tho a lalut. The Dick Wolf show aṭang pawhin Hargitay hian sum a lalut hnem bawk. Indian actress Priyanka Chopra chu pariatna a ni pha a,Bajirao Mastani leh Jai Gangaajal te hi a hlawhtlinpui langsar an ni.
Sum lalut hnem 10
1. Sofia Vergara - USD mtd 43 6. Kerry Washington - USD mtd 13.5
2. Kaley Cuoco - USD mtd 24.5 7. Stana Katic - USD mtd 12
3. Mindy Kaling - USD mtd 15 8. Priyanka Chopra - USD mtd 11
4. Ellen Pompeo - USD mtd 14.5 9. Julianna Margulies - USD mtd 10.5
5. Mariska Hargitay - USD mtd 14.5 10. Julie Bowen - USD mtd 10