Korn bassist Reginald 'Fieldy' Arvizu ve thung hi le

Nu metal band hlawhtling, Korn hi Pathian hmuh nana hmun ṭha a ni! Kum 2005 khan an guitarist Brian 'Head' Welch chu a piangthar a, India ramah missionary hna a thawk a, tunhnai khan Korn-ah a let leh. Hemi hnu hian an bassist, Reginald 'Fieldy' Arvizu chu a piangthar ve leh a ni.

Tunhnaia an guitarist Brian 'Head' Welch an band-a a kir leh hnu lawkah Fieldy hian a pianthar dan chanchin a sawi chhuak thar leh a, Pathian nena an intawh dan chu 'rilru sawi nghing dawt' thil a ni a ti. BlabberMouth-in a tarlan dan chuan "Hai der theih rual loh kohna' a nih thu a sawi a ni.

Fieldy chuan a ṭhianten Kristian nih chu engkim thlak danglam a ni mai tiin an sawi fiamthu ṭhin tih a sawi. Fieldy chuan, "Mite hian Krista an pan lohna ṭhin chhan chu inthlak danglam turin an la inpeih loh vang a ni," a ti. An awm dan hlui kalsan an hreh ṭhin tih a sawi a, "Piangthar chuan engkim kalsan tura inpeih phawt a ngai niin an sawi a, mahse chutiang hun kan nghah chuan engtikah mah kan inpeih thei ngai lo ang," a ti. "Isua chuan 'i nih ang ang khan min rawn pan rawh' a ti. Hei hi kan hriat loh ṭhin avangin mi tam tak hian sakhaw thil hi kan chawhpawlh vel mai mai a ni," a ti.

"Mi ṭhenkhat chuan sakhaw mi ta viauah min ngai a, mahse ka sakhaw mi lo," tiin Fieldy chuan a sawi tlat. "Isua nen kan int‚wk a, ani nena inlaichinna kumhlun neih ka duh. Chu chu sakhaw mi nen chuan a inang lo. Hei hi mi tam takin an hriat thiam loh ṭhin chu a ni," a ti. Kristian a nih tak avangin midangte a hmangaih thei tawh a, chu chuan an band, Korn chhungkuaah pawh thil ṭha tam tak a thlen a ni tih a sawi. Pathianin amah a hmangaih angin midangte hmangaih a zir a, chutihrual chuan mahni ṭha leh fel intihna a awm lohna turin theihtawp a chhuah a, a nun chu a veng reng bawk.