Amitabh a la ropui

Putar a ni tawh a, mahse Bollywood huang chhungah chuan Amitabh Bachchan hi Big B a la nihzia Pink film aṭang hian a lang.

Amitabh Bachchan leh Taapsee Pannu te channa Pink chu Indian box office aṭanga sum lalut hnem ber a ni. He movie hi court room drama a ni. Pathianni thleng khan Pink hian India ram chhungah Rs. vbch 21.51 lai a lalut tling tawh.

Pink hian Zirtawpni khan Rs. vbch 4.32 lai a lalut a, Inrinni khan Rs. vbch 7.65 a lak belh leh a, Pathianni khan Rs. vbch 9.54 hmuh chhuah belhin, a sum hmuh zawng zawng hi Rs. vbch 21.51 a tling tawh a ni.

India-ah chauh ni loin, Gulf ram leh North America lama Indian awmte pawhin an en nasa hle. UAE, US leh Canada aṭanga sum a hmuh chhuah tawh zawng zawng hi USD 978,744 lai a tling tawh a, chu chu Rs. vbch 6.55 a ni. Tunkar chho hian sum ṭhahnem tak a lakluh belh leh ngei a rinawm.