Judith-i a reh rei ta mah mah!

Idol aṭanga kan hmelhriat, Judith-i chu a u, Lawma nena album an tihchhuah hnuah a reh ta vang vang mai a, ngaihṭhat thlak loh khawpin a reh a, kuminah pawh a music video kan la hmu chuang lo.

Kum 2013 December thla khan Judith-i leh a nuṭa Lawma te album 'I hming ropui nan' tih chu tlangzarh a ni a, hemi kuma Gospel album chhuak zinga ṭha ber pawl a ni. An album hming an puttir hla 'I hming ropui nan' tih hla chu Kum 2014 March 17 khan Ṭhazual Faknaah pakhatna a rawn luah. Hemi hnu hi chuan Judith-i hian an unau emaw, mimal emaw pawhin music video a tichhuak ta lo. Hemi hnua a chanchin kan hria langsar leh chu nikum July thlaa London-a O2 Arena-a a zai kha a ni leh mai.

Hetiang taka a reh a, a reh mah mah tawh kan tihlai mek hian a ruk chuan Judith-i hian hma a la chho ṭan leh mek. Music video thar a buaipui leh ṭan mek a, pakhat chu recording an zo tawh a, shooting an ti vel mek a, pakhat dang erawh chu track an siam vel mek bawk. Kum khat chuang music video thar nei lo leh tichhuak loa a awmna chhan chu 'zirna vel thil' vang a ni. Tunah hian a hna atan training a nei mek a, Kolasib-ah a awm daih rih a, chuvang chuan hma pawh a la chak tawk thei lo deuh.

Judith-i chuan, "Nia ka reh rei khawp mai. Hna leh zirna lam thil vang a ni. Tunah hian hla pahnih ka buatsaih mek a, pakhat zawk hi kumin chhunga ka tihchhuah hman ka ring a, pakhat erawh hi chu kum thar lamah a ni ang," a ti. A unaupa Lawma nena zai dun leh chungchangah Judith-i chuan, "A hna avangin a hman lo em a, zai lam pawh a ngaihsak hman rih lo. Engtikah emaw chuan kan unauin music video chu kan la tichhuak leh ang," a ti. Amah bik erawh chu kuminah video thar nena rawn lan a tum. Lawma bik hi a hna mai bakah BESY Choir-a a tel avangin thil dang ngaihtuahna hun a nei vak lo.

Training-a Kolasib-a a awm mek rual hian Judith-i hian zaina tur programme a ngah viau bawk. Hun chu ngah lutuk lo mah se, Judith-i hian kumin hi chuan a zai min ngaihthlaktir leh a tum.