Adele 25-in Diamond a hmu ta Album mala hralh hnem ber Thriller

RIAA-in album hralh hnem dan aṭanga an certificate ṭhinah, Adele album 25 chuan Diamond a hmu tling ta. Diamond certificate pe thei tur hian Adele hian hun a duh rei lo hle a, kum khat a tling lo deuh.

Adele album 25 hi nikum November thlaa tlangzarh kha a ni a, US-ah chauh copy maktaduai 10 a hralh tling tawh a, copy maktaduai 10 hralh tling chinte hi Diamond an ni. A album hmasa zawk, kum 2011-a a tihchhuah 21 pawh khan Diamond hi a thleng pha a, Diamond thleng tur hian kum hnih deuh thaw hun a mamawh a, 25 hi chuan kum khat a tling hman lo.

Hmeichhe zaithiam zinga album pahnih hmanga Diamond hmu thei hi an la tam lo hle. Britney Spears hian 'Baby one more time' leh 'Oops! I did it again' hmang khan a hmu a, Mariah Carey pawhin diamond album pahnih a lo nei tawh a, chutiang bawkin Canadian zaithiam ropui Celine Dion pawhin a nei bawk. Diamond album zingah hian Michael Jackson-a Thriller te, Billy Joel-a Greatest Hits Volume I leh Volume II te, Pink Floyd album The Wall te pawh kha a tel.

Michael Jackson-a album, Thriller hi album hralh hnem ber a ni a, Platinum Certificate 32 zet an pe tawh a, Platinum hmu thei tur hian copy maktaduai 1 hralh a ngai. He album-ah hian 'Beat it' tih te, 'Thriller' tihte chu kan hriatlar zual an ni. Led Zeppelin album Led Zeppelin IV chu album hralh hnem ber dawttu a ni a, kum 1971-a tihchhuah kha a ni a, Platinum 23 an pe tawh a, chu chu maktaduai 23 vel tihna a ni. He album hi 'Stairway to heaven' awmna album kha a ni.

Pink Flod album pakhat zawk, The Dark Side of the Moon chu album hralh hnem pathumna a ni a, kum 1973-a an tih≠chhuah a ni. The Dark Side of the Moon album hi copy maktaduai 15 chuang an hralh tawh a, Platinum 15 an pe tawh tihna a nih chu; hei hi kum 1998 kuma mi tawh kha a ni a, tunah chuan maktaduai 20 vel an hralh tawha rin a ni a, Diamond Certificate pahnih a dawng thei thuak tawh a ni. 'Time' te, 'Brain Damage' tihte kha he album-ah hian a awm.