More than Words Extreme

Hmangaihna hi mite hian an sawi mai zel a, sawi a awlsam ang hu aiin a tak taka hmangaihna lantir erawh a har sa thung si. Hei hi Nuno Bettencourt pawhin a hria a, a vei a, hmangaihna hi ṭawng ka chauh a ni lo, ṭawng ka bak thil dang tam tak a ni tih hi hla mawi nalh elkhÍn, acoustic guitar nalh leh ril tak maia cheimawi nen hlaah a rawn tichhuak a, tun thlenga hla chuai thei lo zinga mi a ni ta.

'More than words' hla hi Extreme-a an guitarist, Nuno Bettencourt leh an singer, Gary Cherone tena an phuah a ni. He hla hi tlangval pakhatin nula pakhat a hmangaih em em chanchin anga phuah a ni. Nula hian a hmangaih ve hle tih pawh a hria a, mahse
ṭawng kaa a hmangaih thu bakah, a nun hmanga a hmangaihna lantir tura tlangvalin a duhna hla a ni.

Nuno Bettencourt an kawmnaah he hla chungchang hi sawiin, "'Ka hmangaih che' tih ṭawngkam hi mite hian awlsam takin an hmang mai mai a, he ṭawngkam pathum lek hmang hian engkim hi ṭhattir an tum a, thil pang≠ngaia kaltirtu angah an ngai a ni. Mahse hmangaihna hi chu chu≠tiang chauh chu a ni hauh si lo. A ch‚ng chuan ṭawng ka mai bakah nun leh chetzia hmanga lantir a ngai ṭhin. Chu bakah, ṭawng ka khera 'ka hmangaih che' ti lo hian, sawi chhuak hauh lo pawhin kan hmangaih a ni tih kan lantir thei a ni," a ti. He thu hi khawvela hla mawi ber pawl More Than Words an phuah chhan a ni.

A nalh a, a mawi tehreng nen hian he hla hi a tir chuan a lar loh leh a hlawhtlin loh hlauh avangin Extreme label chuan a tichhuak ngam lo! Nuno hian, "Khatih hunlaia kan label (A&M Records) chuan 'More than words' hla hi single-in a tichhuak duh lo a, a chhan chu hetiang hla hi khang hunlai khan radio-ah an play ngai tlat lo a ni," a ti. Everly Brothers, The Beatles hla angte kha hralh a kal hunlai a ni.

More Than Words hla hi Extreme-in 1990 kuma album an tihchhuah, Pornografitti-ah khan an dah a, funk metal style a ni. Hemi hma, kum 1989 khan anmahni hming, Extreme hming pu album an tichhuak a, hei hi khawvelin a hriat larna hmasa ber a ni ‚wm e. He album-ah pawh hian funk metal style hla an dah nual tawh a ni. An hlawhtlin denchhen hian Pornografitti hi a kum lehah an tichhuak a, More Than Words bakah acoustic dang, Hole Hearted an dah tel bawk.

Pornografitti album aṭang hian 'Decadence Dance' leh 'Get the funk out' hlate single-in an tichhuak hmasa a, mahse heng hlate hian Extreme band larna a belhchhah tam lo. A&M Records-in 'More than words' hla an tichhuak duh bawk si lo. Amaherawhchu mipui hmaa an sakin nalh titu leh duh an tam ta hle a, single-a an tihchhuah hma hauh aṭangin miin an sakpui dual dual thei tawh a ni. Hetiang a nih takah chuan an label pawhin kum 1991 khan 'More than words' chu an tichhuak ta hram a, an beisei loh ber chu a hlawhtling ta ber a ni. Billboard Hot 100-ah pakhatna a rawn luah thei a, khawvel pumin he hla avang hian Extreme hi a hriat lar phah ta a ni. A hnu zelah, an concert-na apiangah 'More than words' hi an sa ta ngei ngei bawk.