Pope Francis-a'n hma a sawn hret

Roman Catholic kohhran hotu, Pope Francis chu Rome-a Gemelli Hospital-ah enkawl chhunzawm zel a la ni a, a dinhmun la ṭha lutuk lo mah se Thawhṭanni khan tlemin hma a sawn hret niin Vatican chuan a sawi.

Thawhṭanni zana Vatican thuchhuah chuan Pope hian tlemin hma a rawn sawn a, oxygen pawh pek reng la ni mah se a pek zat pawh tih hniam a ni deuh tawh niin a sawi. Laboratory test-ah pawh tlemin hma a sawn tih sawiin, a kal (kidney) lama harsatna a neih chu ngaihtuahawm a ni lo tiin, thil pawh pangngai takin a ei thei a ni, a ti. Thawhṭanni tlai khan a lo tih dan ṭhan angin, Gaza-a Catholic parish pawh phone-in a be peih a ni.

Kum 88 mi, Pope hi thawk lamah harsatna a neih avangin February 14 khan damdawi-inah dah luh a ni a, a luh hnuah a chuapah pneumonia a kai ve ve tih hmuhchhuah a ni. Hma rawn sawn mah se doctor-te chuan pneumonia avang hian infection, 'sepsis' a kai mai hlauhawmin a la awm tho tih an sawi.

Pope damna dila ṭawngṭaiin mi tam tak St Peter's Square-ah an pungkhawm ṭhin a, Thawhṭanni tlai pawh khan Cardinal Secretary of State, Pietro Parolin kaihhruaiin ṭawngṭaina hun an hmang leh. He huna hian mipui nawlpui bakah Rom ekhawpuia awm puithiam leh nun te bakah Dicasteries hotute leh Roman Curia member-te pawh an tel.