Taylor Lautner-in Selena Gomez thlavang hauh

'Twilight' star Taylor Lautner chuan 2025 SAG award semna Red Carpet-a Selena Gomez pianhmang an sawisel zui chungchangah Gomez-i thlavang a hauh. Selena Gomez hi 2024 SAG awards Red Carpet-a inlan ṭumin a pianhmang inthlak danglam chungchang vangin sawizui a lo hlawh tawh bawk.

Twilight star hian a IG story-ah Gomez-i chungchang ngeiawm tak taka an sawina screenshot chu rawn dahin, "Mi zawng zawng i ti lawm thei ngai lo a, i tih kher pawh a ngai lo. I taksa pianzia, rawng leh hmel lan dan ringawt kha i nihna a ni lo," tiin Gomez thlavang hi a hauh zui a ni. Lautner hian Twilight franchise-a Jacob Black lem a chan zawh hnuaah a taksa landan chungchangah sawiselna a lo tawk tawh a, hei hian a rilru lam thleng pawhin a nghawng tih a sawi.