Chris Hemsworth A film atan insum thei

'In the Heart of the Sea' film an chang mek a, he film a channaah hian Chris Hemsworth a insum thei hle a, ni khatah calory 500 chauh a taksaa lalutin a khawsa thei a ni.

'In the Heart of the Sea' hi lawng chhiat tawh chanchin a ni a, lawng chhiat tawka thawk, sailor lemah Chris Hemsworth hi a chang a, a channaah hian chêr tak anga lan a ngai si a, chuvang chuan ei leh in lamah nasa takin a inhrek a ni. Mi pangngai hian a rihna hloh loa awm reng thei turin ni khatah calory 2,500 tal a taksaah a lakluh a ngai a, hmeichhiaah chuan 2,000 a ngai thung.

Kum 32 mi, Australian actor hian lawng chhiat avanga hrehawm tuara chêr tak anga an lan a ngaih avangin an rihna hloh nasat a ngai tih a sawi a, "Ka ngainat leh tui ka tih ber ber - burger, chocolate leh ice cream te ei loh a ngai a, a harsa duh ngang ngang khawp mai," a ti. "Heng ka ei châkte hi ka ei châk tawh hle mai a, engtik lai pawh hian ka rilruah hian a awm reng a ni ber," a ti.

'Cast Away' film-a Tom Hanks insum theihna kha a ngaisang hle. Kha film-ah khan, thlawhtheihna chesual Tom Hanks chu a dam chhuak a, thliarkar pakhatah amahin a awm a, ei tur mumal nei lo nen, a chêr hle. Hetianga chêr tur hian Tom Hanks hi a insum nasa. Hemsworth chuan, "Tom-a khan a tihdan tur min kawhhmuh niin ka hria a, a tih theih chuan kei pawhin ka ti thei turah ka ngai a ni," a ti.