Kari Jobe-in ‘The Blessing (Live Album)’a tlangzarh

GMA Dove Award-a che ṭha ṭhin tak, Christian artist zinga khawvel pum huap pawha huhang ngah ber pawl, Worship Leader ṭha tak ni bawk Kari Jobe chuan hun rei tak ata a lo er tawh a live album 'The Blessing' chu Zirtawpni liam ta khan a tlangzarh.

"He album atan hian kum hnih chuang ka thinlung ka pe tawh a, Pathian hnenah A kohhrante tana sak tur leh puan chhuah tur ka dil nasa ṭhin hle- kuminah hian eng nge thleng dawn ka hre lawk bik si lo," tia sawiin,"Tun ang hun, hlauhnain khawvel mite rilru ngaihven zawng lakpen a tum lai hian heng hlate hian thudik thiltihtheihna leh Pathiana beiseina awm thilthihtheihzia a tarlan ka ring. He khawvela thil engkim mai hi a danglam niin a lang a, mahse Pathian erawh a danglam ve lo a, a danglam ve ngai dawn lo a ni," tiin a album thar tur chungchang hi Jobe chuan a sawi a ni.

'The Blessing (Live Album)' hi kumin nipui lai khan Kari Jobe hian hrileng karah a record a, live album dang ang lo takin punkhawm chi ziazang a nih loh avangin chhimtu awm loin an recording leh video-te pawh an siam a ni. Hla 15 a awm a, he a album tlangzarh thar rual hian Zirtawpni zanah khan The Blessing watch party a host zui bawk.

'The Blessing' album-ah hian  Cody Carnes, Austin Davis, Jacob Sooter, Jonas Myrin, Elyssa Smith, Steffany Gretzinger, Chris Brown leh Steven Furtick bakah Passion member Kristian Stanfill leh Brett Younker-te nena an hla phuahte a dah tel.

Jobe hian a album thar title song 'The Blessing' hi a pasal Cody Carnes, bakah Elevation Worship member Steven Furtick leh Chris Brown-te a phuahpui a, hripui nasa taka a len hma lawk khan single-a tichhuak hmasain YouTube-ah thlirtu maktaduai 32.2 lai a nei tawh a, global audio stream-ah mtd 70 chuang stream tawh niin  Spotify U.S. viral 50 leh global viral 50 playlist-ah pawh telh a ni hial.