Miss Mizoram Foundation hawng

Hmeichhiate leh naupang harsatna tawk te ṭanpuina kawnga hmala tura din Miss Mizoram Foundation chu Zirtawpni liam ta zanah khan HYVE conference hall-ah IPR Minister Lalruatkima chuan a hawng.

Miss Mizoram Foundation hruaitute chuan kum kal taah ringawt pawh khan hmeichhiate chunga hleihlenna thleng avanga harsatna tawkte aṭangin Women Help Line-ah phone call 6854 a awm tih an sawi a, Foundation hawn a nih hma hian Champhaia hmeichhe naupang vanduaina tawk hnenah ṭanpuina Rs sing 4 bakah  Mizoram Truck Owner Association hnenah an member harsate ṭanpuina turin Rs sing 4 bawk an lo hlan tawh a ni.

Minister Lalruatkima chuan hun harsa tak kan tawn chhoh mek laiin kan khawtlang leh ramin hmasawnna kawng a zawh chhoh zelna turah ṭhalai ngaihtuahna hriam zawkte pen chhuak zel turin a sawm.

Miss Mizoram lo ni tawh Rody H. Vanlalhriatpuii chu Miss Mizoram Foundation-ah hian President a ni a, Secretary chu Zirsangpuii niin Dy Chief Minister Tawnluia chu patron a ni bawk.