Streaming service-te'n 'No Time to Die' lei an inchuh!

"Thuthang vel mai mai chungchang kan sawifiah ngai lo. he film hi zawrh a ni lo. Film tlangzarh hun April 2021 atan tihkhawtlai a ni mai a, hei hi movie en ṭhinte'n theatrical experience an neih humhimna tur pawh a ni," tiin MGM thupuangtu chuan Variety magazine chiang takin hrilh mah se Apple, Netflix leh streaming service dangte chuan James Bond film thar ber tur 'No Time to Die' chu lei an inchuh niin khawthlang media-te chuan an tarlang a, chung zingah chuan Variety vek pawh hi an tel!

James Bond film siamtu studio MGM hian film tlangzarh hun sawn hlat avang hian $maktaduai 30-50 vel an hloh tawh nia sawi a awm a, hetiang a nih avang hian 'No Time to Die' pawh hian $mtd 600 vela streaming service khawi emaw ber hnena hralh mai pawh hi an hreh lo niin MGM elpui studio-a thawk ṭhenkhatte chuan an sawi niin Variety chuan a tarlang a ni.

Hemi chungchangah hian MGM lam hian hralh tum lo ang takin ṭawng chhuak mah se khawthlang lam media-te chuan he chanchin hi an umzui nasa hle tho a, eng emaw thil hriat sual an nei pawh a ni mahna! An news report ṭhenkhatah chuan MGM CEO leh share ngah ber Anchorage Capital Group neitu ni bawk Kevin Ulrich chuan film zawrh pawh hi a buaipui dawn tih thlenga tarlangte pawh an awm.

'No Time to Die' hi $mtd 250 vel senga an siam a ni a, hei ai pawh hian an seng tam zawk niin mi ṭhenkhat chuan an la tarlang cheu bawk.