Bradley Cooper Hlawhtling turin a inthunun thei
The Hangover-ah khan a chang thiam viau a, mahse Bradley Cooper-a ropuina ber erawh chu American Sniper kha a ni. American Sniper chang tur khan a taksa nasa taka siam danglam a ngai a, a siam danglam thei tlat! Acting hi thil namen a ni lo a, insum theih a, mahni inthunun theih a ngai.
American Sniper-a a chan dawn khan, indo mi, ralhrat mi anga a taksa leh pianphung pawh a lan a ngai a, sek, tihrawl ngah a ngai. Chutiang tur chuan ei leh inah a insum a, a taksa nasa takin a sawizawi a, a rih belh a ngai a, chung chu a tihlawhtling thei vek. Bradley Cooper hian American Sniper a chan khan kg 20 vel deuh thawin a rih belh thei a, a rih belhna hi thau ni loin, tihrawlin a ni. Chumi tur chuan nasa takin a thawk a ni.
Mahse Bradley Cooper-a'n chan harsa a tih ber chu American Sniper hi ni loin The Hangover kha a ni daih. Hetah hian Cooper hi rilru lama dam lohna, bipolar natna nei anga a chan a ngai a, a buaithlak ve khawp ang. Hetiang natna neite chu a changin an mood a ṭha em em a, a changin an ngui leh em em ṭhin.
A tir aṭanga film changa hlawhtling nghal a ni bik lo, lehkha a zir chho a, acting lamin a rilru a la a, chu chu a zir ta a ni. A zir chhung hian a chhungte'n an chawm lo a, amah a inchawm chawp vek. Acting a zirlai hian New York Manhattan venga Morgans Hotel-ah a thawk ṭhin a, mikhual te a hruaiin an awmna tur pindanah a dah ṭhin. A mikhual hruai zingah chuan Leonardo DiCaprio pawh a tel nghe nghe. Hetihlai hian Leonardo hi Titanic film avang khan a lar tawh hle a, Cooper erawh a la lar lo mai ni loin, film a la luhchilh lo a, a zir mek a ni. Kum 2000 khan Master of Fine Arts a zo chauh a ni.