Rûl ke nei an hmuchhuak

Fossil lam zir mi leh zawng mite tana thu lawmawm tak mai a thleng a, hei hian evolution theory-a ngaihdan awm ṭhin ringawt a nemnghet thei dawn niin an hria a, mithiamte an lawm hle.

University of Ports­mouth-a mi, Dr. Dave Mar­till chuan rul ke nei fossil hmuhchhuah chung­chang hi a sawi a, rul hi tuipuia awm ṭhin laiking (lizard) aṭanga rawn piang ni loin, khaw­mual laitel aṭanga rawn piang a ni zawk a ni, a ti.

Rul ke nei fossil hi Brazil aṭanga hmuh­chhuah a ni a, Cretaceous period-a mi niin, kum maktaduai 110 vel zeta upa a ni. He rul hi scientist te chuan Tetra­podophis amplectus tia koh a ni a, a lian lo hle a, feet khat tling lo deuh, centi­metre 20 chauha sei a ni a, mahse hei aia lian hian a la ṭhang lian thei niin an ngai a, fossil an hmuh hi a la puitling tawk lo deuh nia hriat a ni. A lu hi puitling kut tin tiat lek a ni. A ke hma lam hi centimetre khat chauha sei a ni.

Tetrapodophis hi dil al (salt lake) chhehvel, hmun ro taka cheng ṭhin nia hriat an ni a, amphibian leh laiking lam chi thote chawah a ring ṭhina ngaih a ni.

A hmuchhuaktu Dr. Martill hi German palae­ontologist, Helmut Tischlinger nena thawk dun ṭhin an ni a, evolu­tionary stage-a rul lo pian chhuah dan a zir bing hle. He rul awm hunlai, Cretaceous period-ah hian South America leh Africa khawmual inzawm lai, Gondwana an tih hunlaia mi a ni. Fossil an hmuhchhuah aṭang leh zirchianna aṭangin rul lam chi ho hi Gondwana khawmuala rawn awm ṭan, a hnu fea khawmual danga darh taa ngaih an ni.