Feli Fanai a liam thei lo

'Ka liam e' ti ti mah se, Feli Fanai hi a liam mai kan la phal lo a, Rainbow Ṭhazual Lengzemah a ṭum thum nan pakhatna a rawn hauh leh ta.

Feli Fanai a lawm hle a, a hla miin an hlutsak a, a beisei aiin mipuiin an dawnsawn ṭhat avangin a lawmzia a sawi. "Ka lawm tak meuh meuh a ni. Miin min lo ngaihhlutsak a, chu bakah keimah rau rauah ka hla hmasa leh music video tihchhuah tawhte aiin tuna 'Ka liam e' tih hlaah hian hma ka sawn hle a ni tihte min hrilh a, a lawmawm tak meuh meuh a ni," a ti.

Pakhatna ṭum thum zet a hauh thei a, lengzemah chuan hla hlawhtling pawl tak a ni. Feli chuan, "Hetiang em ema a hlawhtlin hi chu ka beisei ngam chiah lo a, ka ring ngam chiah lo bawk, mahse he hla ber kherah hi chuan, ka hla hmasate aiin ka beisei a sang zawk. Keima single video ka tihchhuah lohna a rei tawh avangin a siam lamah kan uluk em em a, theihtawp kan chhuah a,ṭha thei ang ber turin a tir aṭangin kan buatsaih a ni. Hetianga kan uluk avang hian Ṭhazual chart-ah te hi chuan a lan ve mai ka ring a, mahse pakhatna a luah zawn tlut tlut erawh ka beisei pha lo a, ka beisei ngam lo bawk," a ti.

Feli Fanai hian tunah hian music thar nei turin hma a la leh mek a, pakhat a buatsaih mek chu zaithiam leh hla phuah thiam, LK Sailo nen a ni. A hla hi LK Sailo phuah a ni a, ani hian track, recording leh video te pawh an buaipui ang. Theih anga ranga ṭha sia peih an tum a, mahse hmabak erawh a la tam. Hei bakah hian Anggu's Collection-a mi tur an buaipui mek bawk a, a track hi Michael M Sailo kutchhuak tur a ni a, ani hian a khawih mek.

Rainbow Ṭhazual lengzem chart hmasaa pahnihna C. Sanga chu palinaah a chhuk a, Thiamchantira hla 'Lokir rawh' chu pahnihnaah a rawn chho thung. Thangromawia Thomte chu parukna aṭangin pathumnaah a rawn chho a, Tetea J hla, 'Chawlhni tlai len' chu top 5-ah a rawn chuang kai ta bawk.

Top 10-ah hian Serchhip nula, Mizo Idol hnuhnung bera pahnihna, Lancy chu a rawn lang thar a, Lancy hla hi 'Mangṭha' a ni. A hmaa top 10-a lang Christy chu a lang pha ta rih lo thung.

Rainbow Ṭhazual Lengzem

1 Feli Fanai - Ka liam e

2 Thiamchantira - Lokir rawh

3 Thangromawia Thomte - Hmangaihna aia rosum

4 C Sanga - Chhingkhual Lenmawi

5 Tetea J - Chawlhni tlai len

6 Lawmi Khiangte - Tunge Ruati I ngaihzawng

7 MSU Shillong - Ram leh hnam tan

8 Famkimi Kawlni - Ka ngai em che

9 Samuel Chhangte - Lungrun

10 Lancy - Mangṭha