Taylor Swift 'Folklore' sang takin a zuang leh ta

Billboard 200 chart-ah Taylor Swift a inlar ṭha leh a, a dinhmun a tlahniam tawh dawn emaw tih hnuah pakhatna a rawn ni leh. Pop Smoke 'Shoot For The Stars Aim For The Moon' chu pahnihna niin 21 Savage & Metro Boomin 'Savage Mode II' chu pathumna a ni.

Taylor Swift studio album pariatna 'Folklore' chu top 10-ah a lang pha tawh dawn lo emaw tih hnuah a rawn invawrh leh a, pakhatna a rawn ni leh. 'Folklore' hian record hrang hrang Swift hi a siampui hnuah a hnufual ve hret hret a, kar hmasa lamah phei chuan 10-na a ni pha ṭawk. Tunah erawh pakhatnaah a rawn inhlangkai leh a ni.

Billboard 200 chart-ah hian 'Folklore' hi kar riatna (a zawn ni lo) atan pakhatna a ni leh ta a, a dinhmun a rawn invawrh nasa leh hle a ni.

Siwft hian a autograph awmna CD online hmanga a zawrh avangin a album sale a kal thar leh hle a, kar liam ta chhung khan album unit 76.5k a hmu chhuak a, album sales bikah 57k a hmu chhuak. Streaming lamah chuan maktaduai 24.3 lai stream a nei a, song sale 3.6k a nei bawk. Billboard 200 chart-ah hian kar 13 chhung 'Folklore' hi a lang tawh a, 'the 1', 'cardigan' leh 'exile'-te chu miin an ngaihthlak nasat zual a ni bawk.

Pop Smoke 'Shoot For The Stars Aim For The Moon' chu Billboard 200 chart-ah kar 16 chhung lang tawkin chart hmassah khan No.1 a ni a, tunah No.2 ni lehin chart top 3-ah hian a kual a kual a ni ber.

Pakhatna pawh lo ni tawh 21 Savage & Metro Boomin 'Savage Mode II' chu pathumna  ani bawk.

Tom Petty 'Wildflowers' chu Billboard 200 chart top 10-ah a rawn invawrh leh hlawl a, pangana a ni. He album hi chart-ah hian kar 58 chhung a lang tawh a, album sales-ah 29.5K hmu chhuakin, stream mtd 5.7 a awm bawk a, album unit a hmuh chhuah chu 42.k anga chhut a ni.

NCT 'Resonance, Pt.1' chu chart-ah inlan thar bawkin US-a album hralh ṭhat parukna a ni.

US-a album hralh ṭhat zingah hian Lil Baby 'My Turn', Machine Gun Kelly 'Tickets To My Downfall' leh BLACKPINK 'The Album'-te pawh a tel.

Nielsen Music/MRC Data aṭanga a lan dan chuan Taylor Swift chuan a album thar ber 'Folklore' chu copy 57,000 lai kar hmasa khan a hralh leh ta a, hemi chhut tel hian copy mtd 1.038 lai a hralh ta a, kumin chhunga album maktaduai chuang hralh chhuah hmasa ber a ni.

'Folklore' hi puangzar lawk lutuk lem loin July 24 khan Swift hian a tlangzarh a, a hit nghal rem rem hle a, Whitney Houston record lo siam tawhte pawh a khum phah hial a ni kha. Swift hian album pakua lai mai maktaduai chuang copy hralh a nei thei ta bawk.

Taylor Swift album hian hralh a kal ṭhin hle a, nikum August thlaa a tlangzarh 'Lover' kha nikum chhunga maktaduai chuang album US-a hralh awm chhun a ni a, copy mtd 1.09 a hralh a ni. Tunah phei chuan 'Lover' hi copy 1.22 a hralh tawh.