Avatar 2: Kate Winslet eng lemah nge a chan dawn?

James Cameron-a film 'Avatar' chhunzawmna tur Avatar 2 shooting, tui hnuaia neih thlalakah chuan Kate Winslet a lang chiang hle a, a kawngah 'weight' hrengin a thawk lohna turin a hnar a chilh bet a, thla lian tak a nei bawk. He a thlalakna hmun hi Avatar 2 channa atana water tank siam chawp mawngah a ni a, he thlalak a darh hnu lawk hian netizen lam chuan Kate Winslet chu eng lemah nge a chan dawn an hre chak nghal hle.

Kate Winslet shooting neih lai thlalak hi Avatar official social media page-ah tarlan a ni. Winslet hi 'water person' Ronal lemah a chang dawn nia tarlan niin August thlaa  The Hollywood Reporter-in an kawmnaah pawh thaw loa tui hnuaia awm a zir thu a sawi tawh a nih kha.

Avatar-a a role play tur vangin tuia free-dive a zir bakah minute sarih leh second 14 ngawt tui hnuaia thawh loa a awm thute pawh a lo sawi tawh a ni. He a thusawi hi Avatar page lam pawh hian an thlalak dah chhuah caption-ah hian an hmang zui nghe nghe.

Avatar 2-ah chuan tuihnuai lam kan hmu nual dawn pawh a ni mah na, Kate Winslet bakah hian Sigourney Weaver pawhin thla tir lamah khan The New York Times hnenah mithiam zawk hnen aṭangin tui hnuaia thaw loa awm rei dan a zir thute a lo sawi tawh bawk.

Kate Winslet bakah hian Cliff Curtis, Edie Falco, Brendan Cowell, Michelle Yeoh, Jemaine Clement, Oona Chaplin, CJ Jones, leh Vin Diesel-te pawh Avatar 2-ah hian kan hmu dawn a, film hmasa kamna kan lo hmu tawh Sam Worthington leh Zoe Saldana-te pawh an inlan leh dawn bawk a ni.