K-Pop Contest a hlawhtling

'Korean in lam dan a dik khawp mai': Hyemin Jung

Inrinni tlai dar 3 kha chuan K-Pop Contest neihna tur hmun, MZU Multipurpose Hall chu a khah tawh avangin tumah luh phal a ni tawh lo tih an puang tawh. Mahse mipui an la tam a, an la thlen belh reng a, ṭan hnuah chuan hall chhunga awl awm hlek chu an luah khat vek tawh a ni.
K-Pop Contest North East Region chu hlawhtling taka hman a ni a, mipuiin Hyemin Jung an lawm hle. K-Pop contest-ah hian Mizoram leh hmar chhak state dang aṭangin contestant 16 an awm a, heng zinga 10 hi lâm intihsiakah an tel a, zaia intihsiakah paruk an tel bawk.
Manisha Saxena IAS, Com­missioner & Secretary, Govr of Mizoram, Kim Kum Pyoung, KCCI Director leh, Mizoram Minister of State, Lalrinmawia Ralte ten thu an sawi a, K-Pop Festival promotional video te tihchhuah a nih hnuah intihsiak ṭan a ni. Intihsiaknaah hian Mizoram aṭang mai bakah Assam, Arunachal Pradesh, Manipur leh Meghalaya aṭangtein an rawn tel.
Lâma intihsiakah hian mipuiin thiam an tih Frozen Crew, Mizoram chu pakhatna an ni a, pahnihnaah Assam aṭanga rawn kal, mipui lawm hlawh, Dance Xenos chu niin, A-5 team, Mizoram chu pathumna an ni. Zaia intihsiakah hian Assam aṭanga rawn kal, Priyanka chu pakhatna a ni a, Mizorama mi Jared B chu pahnihna niin, Mizorama mi vek, Lushai Diamonds chu pa­thumna an ni. Zai leh lâma intihsiaka pakhatna ve ve hi North East aiawhin August 28-a Delhi-a intihsiakna pui an neih turah an tel dawn. Kumin hian hun danga an la tih ngai loh a thleng a, North East region aṭang hian lâma intihsiaka pahnihna, Dance Xenos te hi Delhi-a intihsiakna pui zawkah an tel ve bawk dawn a ni.
Delhi-a Grand Finale neih turah hian Gold winner chu Korea-a an kal dawn bakah, Hyundai Car Grand i10 an dawng a, trophy pek an ni bawk ang. Zaia intihsiakna pui bera pakhatna hi Korea-a kalpui a nih bakah Samsung S6 Edge 64GB a dawng dawn a ni.
Intihsiak a zawh hnu hian K-Pop star, Hyeming Jung chuan hla pathum a sa a, lawm a hlawh hle a, ani pawhin Mizoram chu nuam a ti hle. Hyemin Jung hian Mizoten Korean ṭawng (hangul) an hman leh an sak chu an lam thiam a, Mizoten Korean ṭawng kan lam dan chu a dik hle a ni a ti.
Tuna K-Pop Contest-a tel tur hian April 18 daih tawh khan audition hi an hawng tawh a, June 30 khan khar a ni a, hetah hian India ram hmun hrang hrang aṭangin tel tuma demo thehlut 244 zet an awm a, chung zingah chuan Delhi leh Mizoram aṭanga thehlut an tam ber. Mizoram aṭang bik hian dance crew 17 leh zai tura demo pe 17 ve ve an awm a ni. Tel tur hian kpopindia.com-ah an home performance video hi an thehlut.