Hyemin Jung hoin KCCI an rawn thleng Vawiinah K-Pop Contest an Ṭan dawn

Nimin khan K-Pop Contest, North East Region neih turah Korean Cultural Centre India hruaitute hoin Hyemin Jung leh Yonhap news agency te Aizawl an rawn thleng a, vawiinah K-Pop Contest hi Mizoram University Multipurpose Hall-ah neih a ni ang. Hetah hian luh man a awm dawn lo a, a duh apiang tan en theih a ni dawn a, security erawh an khauh ang. Tlai dar 5-a ṭan tur a ni a, tlai dar 3 aṭangin gate hawn a ni ang a, dar 4:45-ah khar a ni ang.

Hyemin Jung leh KCCI hruai­tute leh anmahni ṭawi­awmtute hi an rawn thlen hnuah State Guest House, Chaltlangah press con­ference neih a ni a, hetah hian press miten nen an inkawm. Hyemin Jung hian Mizorama a rawn kal thei chu vannei a intih thu a sawi a, chumi rualin, an group ṭhin, Gavy NJ nena inzawm leh an tum leh tum lohna zawhna chu tunah rih chuan a tum lo tih a sawi.

Hyemin Jung hi Korean zai­thiam hlawhtling berte zinga mi a ni a, kum 2005 khan Gavy NJ hoin an album hmasa ber an tichhuak a, a hlawhtling hle a, Korean chart-ah te pawh a sang ber zingah a lang phak a ni. Korean Golden Disc award pawh a lo dawng tawh a, Los Angeles, USA; Japan leh Hong Kong-ah te pawh concert puitham tak tak an lo nei tawh ṭhin bawk. Kum 2012 khan a solo hmasa ber a tichhuak a, kum 2013 khan single album a tichhuak leh a ni. Tunah hian album thar a buaipui leh mek. A zaithiam ngaihsan chu Beyonce Knowles a ni.

KCCI chuan kum 2012 aṭang khan K-Pop contest hi India ramah an buatsaih ṭan tih an sawi a, kumin hian region hrang hranga intihsiakna neih a nih hnuah a ti ṭhate August 28 khian Delhi-ah an intihsiak leh ang a, chuta a ti ṭhate chu Korea-ah an kal ang. India hmarchhak bikah hian kumin hi intihsiak an vawi hnih buatsaihna tur chauh a ni. Nikum khan Dimapur, Nagaland-ah neih a lo ni tawh.

Intihsiakna hi Aizawl bakah hian Bangalore, Chennai, Mumbai, Kolkata, Patna, Nepal leh New Delhi-ah te neih a ni ang. A tawp intihsiakna, August 28-a neih turah hian lâm (dance)-ah lawmman pathum Gold, Silver leh Bronze te siam a ni. Gold dawngtute hi Korea-ah an kal ang a, chu bakah Hyundai Grand i10 an dawng ang. Zaia intihsiaknaa pakhatna pawh Korea-ah an kal ang a, chu bakah chuan Samsung S6 Edge 64GB an dawng tel bawk dawn a ni. A thiam berten Korea-a kalna chance an neih bakah India aiawhin K-POP Festival 2015, Korea-a neih turah an tel bawk dawn a ni.