Intihsiak loin zaninah show an nei dawn

Angela Lalremruati a tlak hnuah Mizo Idol chu zanin hian chhunzawm leh a ni ang a, hetah hian intihsiak loin TV show angin kalpui a ni dawn. Kar lehah intihsiak hi chhunzawm leh a ni ang.

Zanina show neih tur hi top 8 chinten an hmang ang a, track nen hla pakhat ṭheuh an sa dawn a ni. Hei bakah hian anmahni mimal chanchin tawite an sawi ang a, a buatsaihtute lam chuan a ngaihnawm viau ang an ti.

Show-ah hian backstage host pahnih - Fiona leh Mawitei te an zai dawn a, en a chakawm khawp mai. The Chosen aṭanga kan hriat lar pahnihte zai hi mi tam tak ngaihven a ni. Dar 8-ah tho ṭan a ni ang a, Hotel Floria-ah show hi neih a ni ang.

Intihsiakna neih tawhah, team pahniha ṭhen a ni a, BZA team leh Kima Chhangte team tea ṭhen a ni a, BZA team an la dam kim a, Kima Chhangte team aṭangin pahnih an tla ta. Angela Lalremruati tlak chungchangah Kima Chhangte chuan, "Stage monitor kha kan han puh deuh a, amah hrim hrimin pressure a zo lo deuh pawh a ni tho bawk. Mipui thâwm a rin khan stage monitor-a a ri a hliah thei deuh a, pressure nena a thawh kawp tawh chuan a zai tan kha chuan chetsual theihna chance lian tak a awm a ni. A key thlak te a awm avangin monitor-a music ri hriat ṭhat theih loh nen, pressure avanga tlêma zâm ve deuh nen chuan zai chhiat palh a awl a ni," a ti.

Kima chhangte chuan, "Tuna a awm chinhoah hi chuan ka beisei a sang ang reng viau a, stage pawh an ngam sâwt viau a, pressure pawh ngaiah an nei chho ṭan dawn niin ka hria," a ti. Zanin programme tur bikah, "Contestant-te tan pawh a ṭha hlein ka hria a, an tan chawlh hahdamna hun a ni dawn a, an aw leh taksa chau lutuk tur pawh a tihahdam theiin ka ring," a ti.

BZA, Blue Waves naute erawh an la dam kim. BZA chuan fiamthu deuhin, "Idol chhiarkawpte hi a awm ve deuh a...anmahni an la ṭhat rih vang niin ka hria," a ti. "A pumpuiah contestant-te hian pressure an zo lo deuh niin ka hria. Practice-na lamah chuan ka duhthusamin an zai ṭhin a, an thiam em em a, mahse intihsiakna dawhsanah tak hian ka beisei angin an zai lo leh ṭhin," a ti. Complain a dawn chu stage-a monitor an dah tho chu a ni a, mipui thawmin a lân thei deuh tih a sawi.