Nicki Minaj a lawm lo!

MTV VMA nomi­nation list tihchhuahah, zaithiam tawk leh chham thiam tawka inngai Nicki Minaj lawm a kim ve meuh lo tlat! Minaj hi category pathumah nominate a ni a, heti chung hian a lawm lo. A lawm lohna chhan ber chu a music video, Anaconda chu Video of the Year category-a a lan phak ve loh vang a ni.

Minaj hian Twitter-ah a lawm lohna chhan tarlangin, "I video-a hmei­chhe slim, inkhaithli tak a lan chuan nominee zingah a lan ngei ka ring," a ti a, a video-ah model chhe lo deuh a hman loh vanga nominate ni ta lo angah a inngai a nih hmel.

Taylor Swift-in a chhang a, "Kei chuan eng­mah ka ti lo a, mahse ka ngaina (love) chein ka thlawp tlat che a ni. Mahse hmeichhia leh hmeichhia inbeih chu a nalh lo e. Mipa tu emaw ber hian i awh deuh [category] hi a la daih mai thei a nia," a ti. Minaj-in Swift-i thu a hmuh hian a bo deuh a, a lawm vak lo a niang, "...Nangmah chungchang engmah ka sawi loh hi..." tia sawiin, amah chungchang eng vanga tweet nge a nih tih a zawt zui a ni.

Minaj hian zaithiam zingah pawh danglam bik a nih avangin an ngaihthah niin a inngai a, hip-hop artist a nih avangin hmeichhe zaithiam dangte angin an en ve lo niin a inngai a ni. Taylor Swift feat. Kendrick Lamar, "Bad Blood"; Ed Sheeran, "Thinking Out Loud"; Beyonce Knowles, "7/11"; Mark Ronson feat. Bruno Mars, "Uptown Funk" leh Kendrick Lamar, "Alright" te an awm.