25th International Indian Film Academy Awards sem a ni

India Hindi film industry khawvela award ngaihhlut, 25th International Indian Film Academy Award chu March 8-9 khan Jaipur Exhibition & Convention Centre, Jaipur-ah sem a ni. IIAF hian kum 25, silver jubilee a tlin na niin, hemi pual hian award trophy rawng gold ni ṭhin chu 'silver' hman a ni. Award semna hi Karan Johar leh Kartik Aaryan ten an host a ni.

Award ngaihhlut hlawh Best Picture chu 'Laapataa Ladies' in a dawn bakah, award dang pariat lain a che ṭha ber a ni. 'Kill' film chuan award pali la in a che ṭha hle bawk. Award hi category 24 aṭanga sem chhuah a ni.

Kartik Aaryan chuan Best Performance In A Leading Role (Male) chu 'Bhool Bhulaiyaa 3' hmangin a dawng a, Raghav Juyal chuan Best Performance In A Negative Role chu 'Kill' film hmangin a la. Best Performance In A Leading Role (Female) chu Nitanshi Goel-in 'Laapataa Ladies' film aṭangin a dawng ve bawk.