UAE-ah ram dang mi an tam zawk

Keinin chimral kan hlauh viau laiin, United Arab Emirates-ah chuan a ram mi, Arab aiin ram dang mi an tam zawk mai pawh ni loin, ram dang mi awm zawng zawng zatve ang zat pawh Arab mite hian an awm lo.

UAE-a mihring maktaduai 9.2 awm zaa 16.6 hi a ram mi pangngai, Emirati an tih te an ni a, chu chu mi maktaduai 1.4 chauh an ni. Arab dang hi zaa 23 an ni a, a bak zawng chu hnathawka ram pawn aṭanga he rama awm an ni a, Asian an ni ber. Asia-ah pawh India leh a chhehvel ram aṭanga kal hi a ram mi zaa 42.3 zet an ni a, chung zingah chuan Tamil leh Kerala aṭanga kal an tam ber.

UAE, United Arab Emirates hi Arab lal ram hrang hrang pasarih inzawm khawm an ni a, kum 1971 aṭanga ram hrang ni ṭan an ni. Abu Dhabi lalram hi a zau bwer a, a dang paruk inzawmkhawm ai pawhin a zau zawk a, Abu Dhabi khawpui hi UAE ram khawpui a ni bawk. Hei bakah hian Ajman, Dubai, Fujairah, Ras al-Khaimah, Sharjah, leh Umm al-Quwain lalramte a awm leh a, Dubai hi an khawpui lian ber a ni.

Oil leh natural gas an ngah avangin khawvela ram hausa ber zinga mi a ni a, petrol man pawh a tlawm hle. Snicker emaw i lei chuan, dawr ṭhenkhatah chuan an pawisa Dirham khat man petrol te an Free ṭhin!

A hma, ram hran pangngai ang taka an awm hma, kum 1966 thleng kha chuan anmahniin pawisa an nei hrang lo a, India sorkar hnuaiah Reserve Bank of India chuan Gulf Rupee a tihchhuahsak ṭhin a, hemi hnu hian Dinar an hmang a, tunah chuan Dirham an hmang tawh.

Mi an hausa a, motor an nei ṭha si, an motor a tlân chak thei si; hetiang motor chak tak tak ûm an ngaih chang pawha ûm turin police thuam ṭhat an ni a, Dubai police te chuan a hranpa liau liauin Lamborghini, Ferrari leh Bentley squad te a nei. Dubai bikah hian tuichhe paihna tur, sewerage system emaw, leihnuaia tuichhe kawng ang hi an neih loh avangin tuichhia reng reng poop truck an tih hmangin an paih zel ṭhin. Dubai mi hausaho hian golf khelh ve an duh si a, tichuan thlalerah golf course an siam chawp a; golf course enkawl a hautak hle, nitin tui gallon maktaduai 4 pek ziah a ngai.

Thlalera awm a nih avang hian lui pakhat mah a awm lo a, lei hnuaiah tui (underground water) awm mah se, tam tak chu a al tho avangin an tui hmuhna ber chu tuifinriat tui al thlawr fîm aṭangin a ni. Mahse tui man hi a to chuang lo, litre 168 hi Dirham khat man a ni a, chu chu India pawisa chuan Rs. 17.28 man a ni. Petrol hi litre-ah Rs. 31.11 man a ni (Dirham 1.8).

Postal code emaw, Zip code emaw an neih ve loh avangin lehkha emaw, thil thawn tur pawhin Dubai-ah chuan a buaithlak ve hret. Uluk taka a kawtthler leh awmna lai chiang taka ziah lan zel a ngai.

Khawvel huap pawha lar, Palm Beach hi mihring siamchawp thliarkar lian ber pawl a ni a, The World Island pawh a lian ber zinga mi a ni. Mahse The World Island hi a ṭhenkhat lai chu tuipuiah a pil leh tawh. Abu Dhabi-a Capital Gate hi khawvela in âwn ber a ni.

Muslim ram a ni bawka incheina an fimkhur viau. Hmun tam takah chuan luh dawnin inchei dan tur an tar ṭhin. Hmeichhe incheinaah, khup khuh leh bân bûl lutuk chu khap a ni a, short short inbel phei chu phal hauh loh a ni. Muslim ram tih ni mah se, sakhua a zalen ang reng viau a, chutihrualin mahni sakhaw chanchin thehdarh a, inlehtir erawh khap tlat a ni. UAE pumpuiah hian biak in 31 vel a awm a, Hindu temple pakhat a awm bawk. He rama awm zaa 10 hi Catholic Kohhran an ni a, Kristian dang hi zaa pahnih vel an awm bawk.