Stephen Hawking hoin alien an zawng dawn!

Thawhṭanni khan theoretical phy­si­cist ropui Stephen Hawking leh, Russian pa hausa Yuri Milner te chuan planet danga minung an awm leh awm loh zawnna tur project an hawng a, he project atan hian dollar maktaduai 100 zet sum pawh dah a ni.

Yuri Milner hi Russia-a piang billionaire a ni a, Facebook leh company hrang hranga a sum invest aṭanga hausa a ni. Ani hian Silicon Valley technology leh ngaihtuahna tharte hmanga bul ṭan chhoh tur a nih thu a sawi. "Kan hmalak dan tur hi tumahina an la tih ngai loh tur a ni. Kan hnaiha arsi awm makatduai têl aṭang te, vanthengreng laili laia mi aṭang te, Thlasik Kawng chhunga mi leh, Thlasik Kawng hnaivaia galaxy 100 vel aṭangtein kan zawng dawn a ni," tiin London-a Royal Science-a conference-ah a sawi.

He project hi a hmaa minung dang awm leh awm loh an lo zawn tawhna project te aia a let 50 zeta bei nasa leh uara thawk tur a ni dawn a, a hmaa mite lo zawn tawhna hmun let 10 zeta zauah an zawng dawn a ni.

Minung dang awm leh awm loh chungchangah Hawking chuan, "Hei aia zawhna lian zawk hi a awm thei lo. Tun hi khawvel pawna minung dang an awm leh awm loh zawng tura kan tih tak takna nena kan ṭan hun pawimawh a ni," a ti. "He khawvelah hian nunna hi amaha lo awm niin kan ngai a, chutiang a nih chuan planet dangah pawh nunna chu a awm ve ngei a rinawm a ni," a ti bawk.

Tun hnaiah, khawvel hmun hrang hrangah thlengthlawkthei (UFO) leh a kaihhnawih hmuh thu report nasa takin a pung a, hei hian planet danga minung awm ve leh awm ve loh chungchang zawn châkna a tizual nasa hle. Mars-a NASA thlalak te, tun hnaia satellite aṭanga hmuh, khawvel chhuahsan zawnga thlengthlawkthei ang tak an thlawk chhuak video NASA-in a tihchhuahte avangin heti lama hi mi tam takin an ngaihven thar a ni.