Gospel duo Mary Mary-a mi Erica Campbell A hla vanga thlarau bo hmuh thu

Gospel music khawvela hriat hlawh leh hlawhtling, Mary Mary duo-a mi, Erica Campbell chuan tun hnai khan a music ngaithlatu Pathian awm ringlo pakhatin chhandamna a chan dan a sawi. Erica Campbell hi a unaunu Tina nena Mary Mary hminga Grammy Award pawh lo dawng tawh a ni.

Rolling Out chanchin­buin an kawmnaah Camp­bell chuan a laizawn, Tina nena Pathian awm ringlo hmeichhe pakhat an hmuh thu leh chu hmeichhia chuan an hla 'God in Me' aṭanga chhandamna a chan a, Pathian a hmuh dan a hrilh thu a sawi.

Campbell chuan, "Women in Faith event ka laizawn Tina nen kan buaipui a, chutihlai chuan hmeichhe pakhat a rawn kal a, Pathian awm ringlo a nih thu a sawi a, kan hla 'God in Me' mawi a tihzia leh a duhzia min hrilh bawk. A sawi dan chuan chu hla chu a ngaihthlak veleh nalh a ti nghal em em a, tichuan a album chawpa lei turin a chhuak a, a lei a, 'Gospel album ka lei lo ang a, ka ngaithla lo ang ka ti asin le' a ti a, mahse 'God in Me' a duh em avangin a lei ta tho a, a ngaithla a, biak in a pantir ta a ni," a ti.

"Biak in a pan a, chumi hnuah chuan a nun pum chu a inthlak danglam a, Pathian a hmu a, Pathian hnenah a nun a hlan ta a ni," a ti.