Gaming News: Cyberpunk 2077 tlangzarh hun sawn hla leh

Kumin April thla khan an tlangzarh dawn emaw tih hnuah September 17-a tlangzarh turin an sawn hla a, chumi hnu chuan November 19-ah sawn hla lehin tunah chuan ni 21-in an tawlh hla leh tawh a, December 10-ah tlangzarh a ni dawn tih game developer lam chuan an sawi leh ta.

Khawvel hmun hrang hranga gamer-te'n an game nghahhlelh leh thawm nei lian tak Cyberpunk 2077 hi platform pakuaa khelh theih tura peihfel vek an duh vangin tlangzarh hun an sawn hla zel tih CD Projekt Red team chuan twitter-ah an tarlang a, fan-te hriatthiamna an dil zui bawk.

Thuchhuah an siam hmasakah chuan an game chu 'gold' a nih thu tarlangin hei hi gameplay leh content final retail version tura peihfel tihna a ni tih an tarlang zui bawk a ni.

Head of studio Adam Badowski leh joint CEO Marcin Iwinski-te chuan current-gen, next-gen, leh PC a a ruala ship theih tura game peihfel chu chona lian tak a nih thu sawiin chumi atan chuan version pakua-  Xbox One/X, Xbox Series S/X, PS4/Pro, PS5, PC leh Stadia-ahte enchhin vek a ngai a ni, an ti. Chu chuan hun a duhrei ta niin an sawi.

Cyberpunk 2077 hi kumin chhunga game tlangzarh tur zinga ngaihven hlawh ber pawl a ni a,  The Witcher 3: Wild Hunt ai pawhin pre-order a tam zawk.