Billboard 200: No.1-ah Kendrick Lamar rawn kir

Billboard 200 album chart tharah Kendrick Lamar studio album parukna 'GNX' chuan Tate McRae, 'So Close to What' rawn khumin, No.1-ah a rawn kir. US-ah equivalent album unit 90,500 a hralh chhuak tih Luminate chuan a tarlang. Thla li dawn liamtaa tihchhuah ni mah se, GNX bakah a single eng emaw zat chu chart-ah hian an lang chhunzawm zel a ni. Streaming lamah pawh GNX hi a che ṭha chhunzawm zel a, tun kar chhungin a album hian stream maktaduai 103 a nei tawh. Unit 95,000 zinga 16,500 chu physical leh digital hralhchhuah aṭangin a lalut bawk. A track Luther tih SZA a thawhpuina chu Billboard Hot 100-ah No. 1 dinhmun a chelh nghet hle a, Not Like Us leh TV Off-te chuan No. 3 leh No. 4 an luah thung.

GNX hi December 7, 2024 khan chart-ah a debut a, physical release leh Super Bowl LIX halftime show a neih hnuah Feb 22 khan chart-ah pakhatna a rawn hauh leh a, tunah hian a ṭum thumna atan pakhatna dinhmun a hauh leh mek a ni.

GNX hi November 2024-a tihchhuah a nih khan unit 319,000 neiin, pole position-ah a awm a, overall sales-ah pawh tun thlengin unit mtd 1.738 vel hralhchhuah a ni tawh a ni.

PARTYNEXTDOOR leh Drake album '$ome $exy $ongs 4 U' chuan equivalent album unit 90,000 neiin pahnihna dinhmun a rawn luah. Chart hmasa lama pakhatna hauhtu, Tate McRae 'So Close to What' chuan equivalent album unit 87,000 neiin pathumnaah a tlahniam thung. SZA album 'SOS' chu a dinhmun ngaiah awm lehin, equivalent album unit 74,000 neiin palinaah a awm bawk. Sabrina Carpenter album 'Short n' Sweet' chu equivalent album unit 64,000 neiin, pangana a ni.

Billboard 200 Top 10-ah hian Bad Bunny, Lisa, Chappell Roan, Morgan Wallen leh The Weeknd te an lang bawk.