Lalrinhlui Tlumang A tan Idol intihsiak a tawp

'Khawiha nge pakuate' ti loin, 'khawiah nge Lalrinhlui Tlumang kha?' kan tih a ngai ta thung tlat mai! Mizo Idol-ah top 10 ten top 9 thleng tura intihsiak an nei a, Zirtawpni zan khan intihsiak hi result puangin, top 9-a tling tur chin hming tarlanah Lalrinhluii Tlumang a tel ve ta lo.

Lalrinhlui Tlumang, Chawnpui chu Mizo Idol top 10 zingah lang mah se, top 9-ah a inhlangkai zo ta lo. Ani hi Kima Chhangte team a ni a, Kima Chhangte hian a nau pakhat a chân ta. Thawhlehni zan kaltaa intihsiakah khan Kima Chhangte hian a naute zinga a hlauhthawnpui deuh ber anga lang chu Lalbiakmawia, Farkawn/ Republic kha a ni a, a duhthu a sam zan lo deuh a, mahse a beisei loh lamah result-in a ṭhâwng kan ti thei ang. BZA, Blue Waves naute an la dam kim a, an dam kim reng ang em tih erawh a hriat loh.

Top 10 intihsiakah khan Lalrinhlui Tlumang hian RTC hla 'Van sipai, lei duty' tih hla a sa a, he hla hi a hlawhtlinpui ta lo a ni ber ang chu. Judge zinga mi Rinzauva chuan RTC-i hla zinga a nalh ber leh hit ber ber ni lo a thlang tlat mak a tih thu a sawi a nih kha. Hla ṭha tak a ni a, Lalrinhlui Tlumang hian he hla hi a tlangpui zo ta lo. "Ka hla thiam sa a ni a, chuvangin ka thlang" tiin judge zawhna hi Rinhlui hian a chhang a ni. Tla mah se Rinhlui hian bul a ṭan ṭha tawh a, Zo rimawi khawvelah a hming a nemkai tawh a, a tan rimawi lamah chuan hmalam hun êng tak a nei a, chu erawh chu ama kutah a innghat tawh a ni.

Zirtawpni zan khan top 9 result puan a ni a, an intihsiak nghal a; naktuk zanah top 8 result puan a ni ang a, top 8-a tlingte hi an intihsiak leh nghal dawn a ni.