Fashion Fiesta

2010 MTV Video Music Awards-a khawvel mipuite min deng dawt khawpa thawmhnaw dangdai leh maksak Lady Gaga-in thuamhnaw a rawn inbel chhuah, sa tisa khawvel sawizui a hlawh a nih kha. Khatiang thawmhnaw kha khami ṭuma Gaga rawn hak chhuah aṭanga rawn inṭan a ni lo a, kha kha a lar chhuahna mai chauh a ni.

2010 MTV Vi­deo Mu­sic Awards-a Lady Gaga-in a rawn inbel tak aṭang khan de­sig­ner-te thawm­hnaw mak siam chhuah­ah an inel ta emaw tih turin ei tur aṭanga thawm­hnaw siam chhuah an intih hmuh chho a. Kha kawr design-tu Fernandez khan a lar pui viau reng a ni, kha mai kha duh tawk lovin mi nawlpui hak theih turin T-Shirt-ah ei tur lem chuang, a tak ang tak siin a siam chhuak nual bawk a ni. Hun rei tak aṭang tawh khan designer-te hian ram te, leilung leh ni tina an thil tawn aṭangtein an duang chhuak ṭhin a, tunhnai aṭang khan fashion shows leh runway-ah te ei tur leh kamram aṭanga idea neiin thawmhnaw leh a awrh leh beh chi thlengin an lo siam chhuak ta a ni. A ṭhen phei hi chu a tak ang thei tur bera duan chhuah te a ni a, a ṭhen erawh han en mai pawha ei tlak a ni lo tih chiang reng te pawh a awm fo bawk.

Khawvel hriata Lady Gaga-in a rawn tihlar hma deuh khan mi larte thla laksak ṭhintu, mite hriat hlawh tak mai Ted Sabareac chuan a photo shoot pakhatah theme “hunger pains” hmangin Model-te chu an ei tur ngainat ber leh duhzawngte hmangin a lo inthuamtir daih tawh mai a, hemi ṭuma a thawmhnaw design-tu Ami Goodheart chuan thawmhnaw panga lai mai siamin sa, pasta, chhangthawp leh chips te hmangin thawmhnaw dangdai tak tak a lo duang chhuak daih tawh a ni. Saaṭanga siam pawnfen leh Top Alu zailep aṭanga siam te leh Coat pasta Noodles aṭanga siam te hmuh theihin an pholang a, hak reng atana duan chu ni lo mah se heng thlai leh kan ni tin eichawp thil aṭangte hian thawmhnaw dangdai tak tak a siam chhuah theih tih an rawn pholang chiang hle a ni. Ami hian a duhthusamah phei chuan heng ei theih tak tak anga lang, mahse tlo leh changtlung zawk kan ni tin thawmhnaw inbel pangngai anga hak reng theih tur siam chhuah dan kawng a dap chho reng bawk a ni. He photo shot chauh lo pawh Ami Goodheart hian Lady Gaga thawmhnaw a lo siamsak nual tawh avangin MTV Awards-a a larpui tak vak pawh kha ama design-sak emaw ti an awm nual a ni.

Thawmhnaw mai ni lovin Jewellery lamah pawh ei tur hian designer-te idea a pe nasa hle a, jewellery designer lar tak mai Onch chuan Nicky Minaj leh Kate Moss te pawh alo siamsak nual tawh a ni. I heart Radio music festival-a Nicky Minaj-in ar thla ei theih ni awm ang taka lang a rawn awrh chhuah tak pawh kha Onch design hi a ni nghe nghe. Onch-a thil design-te hi a dangdai na >m >m chu a ei theih tak tak emaw tih tur khawpa ang te a ni hlawm. Hei mai hi la duh tawk lovin, Meat Lace an tih mai pawh Onch hian a duangchhuak nghe nghe a, Lollipop leh Balhla lem aṭanga ṭhi siamte leh thil dangdai leh awm ang lo tak tak te Los Angeles-a a dawrah leh a Website-ah te lei theihin a dah chhuak nghe nghe.

Paris fashion week-ah pawn thil dangdai tak tak kan hmu chho ta reng a, design house lian tak mai, hetiang lampang siam chhuak tura kan rin loh ber maiin Fall Collection-ah cereal box cluch, shopping cart bag leh mayonnaise jar set te khawvel hmuh theihin an rawn phochhuak a. Kan hmuh theih chinah Kelloggs bag te leh Kate Spade collection-a Chinesse takeout noodles bawm anga siam bag te hmuh tur a kat nuk mai. Heng mai ni lovin design house lian ten an thil siam chhuah tihlarna ni pahfawmin an Brand signature perfume hmangin Cake leh Ice cream te an siam chhuah hmuh theihin a awm bawk a ni. Kar hmasa lama ka rawn thai lan tak Mocassin collection Mc Donalds aṭanga thawmhnaw leh bag an siam chhuah te thlengin hmuh tur a awm. Heng bakah hian Asos, Forever 21 leh Modcloth te pawhin Shirt leh Top leh a bun lam chi te thlengin heng ei tur hmang hian an lo siam chhuak a ni. Heng a lema kan hmuh ang hian ei mai theih tur niawm taka itawm leh atak ang tak, amaherawhchu incheina atana tunlai tak te an ni hlawm a, i ngainat zawng leh i duhzawng te a awm a nih chuan lo entawn ve leh tawp mai teh.

Tluangpui Hmar
Instructress
Vakiria Institute of Fashion Technology