"A riang tawna'n" Kumina Manuna video hmasa ber

Hard Ray vocalist Manuna chuan kumina a music video hmasa ber tur a peih fel chu a ni leh mai tawh a, he a hla thar hi "A riang tawn'an" tih hla a ni a, Kima Chhangte phuah a ni.

"A riang tawn'an" tih hla hi video shooting zawh fel a ni tawh a, video hi RDS Shots-in a khawih a, MDM Library-ah la dah luh a la ni rih lo deuh a; MDM Library-a dah a nih hnuah TV lamah kan hmuh thuai a beiseiawm. A music hi Acoustic vek niin rimawi dangin a pawlh lo a, ngaihthlak pawh a nuam ngawt ang.

Manuna hian Mami Varte nena Krismas hla an siam dun bak kha chu a mimalin music video a tichhuak leh lawk a, mahse kumina a hmasa ber tur kan hmuh hnu hian a dang pawh kan hmuh thuai a beiseiawm viau. Tunah hian ram ngaih hla a buatsaih mek a, mahse furpui, ruahtui tlak tam hunlai a nih avangin eng vak mah a tih hleih theih loh a, ruahtui a hul deuh hunah shooting neih a ni ang. Hei bakah hian hla dang pakhat pawh phuah a nei mek bawk.

Tuna a video thar hi June thlaa shoot zawh tawh kha a ni a, an uluk hle. A music hi Hard Ray-a an guitarist Malsawma siam vek tho kha a ni. Manuna chuan, "A nalh ka ring a, a hot a, a rang deuh a, kei pawhin a nalh ka tiin ka duh khawp mai," a ti.

Single-in music a tichhuak a tichhuak a, hei vang hian Hard Ray an kehchhia tihna erawh a ni lo. Manuna chuan, "Band anga han chet chhuah leh pawh a chakawm khawp mai a, amaherawhchu hun hi kan nei ta meuh lo a ni. Kan keyboardist hi tunah hian hna avangin Mamit-ah a awm daih a, midangte pawh hi hna nei neuh neuh kan nih avangin hunawl a tam tawh lo a, inhmuhkhawm hrim hrim pawh hi kan harsat viau tawh. Remchang a awm a nih phawt chuan band angin kan la che chhuak ang," a ti.