Bollywood Channel thawhpui hmasa ber Mizo Cardinal Choir

Zaipawl lama keini aia chhe zawka kan ngaih, Meghalaya-in zaipawl hlawhtling tak Shillong Chamber Choir an nei a, mahse anni aia chungnung zaipawl kan nei e! Bollywood Channel chuan Bollywood Republic Bindass Play-a tihchhuah tura Shillong Chamber Choir leh Mizo Cardinal Choir te a bûk hnuah Mizo Cardinal Choir a thlang a, Mizo Cardinal Choir hi music video a siampui hnuah Ningani khan Mumbai-ah tlangzarh a ni a, Bindass Play-ah tihchhuah nghal a ni.

Kumin April thla aṭang khan Mizo Cardinal Choir hian an music video hi an buaipui tawh a, Bollywood film Industry hian recording leh music video hi a siampui vek a, Cardinal Choir hian AR Rahman leh Rangde Basanti movie-a mi Rubaru hla an sa a ni. He hla hi Youtube-ah dah nghal a ni bawk.

Hla zir, Music Compose, live recor­ding, video shooting zawng zawng hi ni hnih leh zan hnih chhunga zawh fel vek a ni. Bollywood Channel hian zaipawl he­tianga thawhpui hi an la nei ngai bik lo a, Mizo tan hrim hrim pawh mel lung pawimawh tak a tling. A hla hi AIR-a pek chhuah a ni tawh a, July chhung hian Bindass Play-ah ni tin tihchhuah ṭhin a ni ang.

Hei bakah hian nakuma Sochi, Russia-a World Choir Game (Choir Olympic) neih turah tel thei turin Mizo Cardinal Choir te hi thlan an ni bawk a, mahse registration fee a tam tham deuh hlek a, tunah hian sorkar an dawr kual mek a, an tel thei ang em tih a la sawi theih loh. World Choir Game (Choir Olympic) hi nakum July 6 aṭanga 16 chhunga neih tur a ni a, khawvela zaipawl intihsiakna lian ber a ni.