Box Office: 'Honest Thief' bawkin ro a la rel

North America Box Office-ah Honest Thief bawkin ro a la rel a, The War with Grandpa chu pahnihna niin The Empty Man chu pathumna  a ni bawk.

Box Office-ah chart hmasaa roreltu Honest Thief bawkin ro a la rel chhunzawm a, theatre 2,502 aṭangin  $2,354,022 a lalut a ni. Honest Thief hian North America aṭangin $7,480,296 a laut tawh a, khawvel ramdang aṭanga a lakluh nen $11,684,869 a lalut tawh.

Liam Neeson channa film hi critics ṭhenkhat chuan 'originality' nei ṭha loah an ngaih thu an sawi a, ṭhenkhat erawh chuan an fak viau thung. Chutih rual erawh chuan Neeson che vel an fak tlangpui thung.

Pahnihna chu chart hmasa lama pahnihna The War with Grandpa bawk ni lehin theatre 2,345 aṭangin $1,913,169 a lalut a ni.

Supernatural horror thriller film, James Badge Dale leh Marin Ireland-te channa The Empty Man chu Box Office-ah pathumna a ni. He film hi horror lam ngaina tan chuan ngaihven chi tak tur a ni ngei ang. US-a Midwestern-a khaw pakhata tleirawl rual mak tak taka an bo ṭhin dan chungchang police retire tawhin a chhui dan lam a ni a, critics ṭhenkhat chuan film hmuhnawm pangngai tak nia an ngaih thu an sawi.

Tenet chu palina niin The Nightmare Before Christmas (2020 Re-release) chu pangana a ni. Film lian tham tlangzarh a nih loh avangin film hlui tihchhuah nawn leh a tam hle a, Hocus Pocus (2020 Re-release), Monsters, Inc. (2020 Re-release) leh The Addams Family (2020 Re-release)-te pawh top 10-ah an lang.

Nikuma romance film lawm hlawh tak The After chhunzawmna After We Collided pawh Zirtawpni liam ta khan US-ah tlangzarh a ni ve ta a, theatre 460-ah tihchhuah niin $422,899 a hmu chhuak a, pakuana a ni.

Tun dinhmunah chuan North America lam aiin China Box office lam a 'hot' zawk rih tlat. Khawchhak ram lianah khian Chinese indo film Sacrifice chu tlangzarh a nih karah sum lalut tam ber a ni nghal a, $mtd 53 lai sum a lalut hem mai. 

Sacrifice hi China rama director lar ber zinga mi Guan Hu, Frant Gwo leh Lu Yang-te siam a ni a, an ram lama film star lar tak tak an chang bawk nen China-ah chuan a tla na nghal hle a, Zirtawpni khan tlangzarh niin $mtd 11 chuang ni khatah a lalut nghal a, ni thum chhungin $mtd 53 hi a lalut hman a ni.