Hmeichhiate'n Hollywood-ah an hlawh tlem bik Amanda seyfried

Mipa leh hmeichhe intluktlanna an sawi viau a, khawthlang ram chu ziaawm viau turah kan ngai mai thei a, mahse a lo ni chiah bik lo a ni ang, actress Amanda Seyfried chuan a lungawi chiah loh thu a sawi.

Amanda Seyfried chuan Hollywood-ah hian hmeichhia a nih avanga thliar hranna, langsar lem lo, pawi tak si a tawk tih sawiin, hmeichhia a nih avangin a hlawh a tlem bik a, mipate lak ang zat hmeichhiate'n an la lo fo tih a sawi chhuak.

Sunday Times-in an kawmnaah Seyfried chuan, "Hman kum khan budget sang deuh tak film-ah ka chang a, hlawh pawh ka nei ṭha ve viau. Amaherawhchu mipa ka chanpui nena ngaihtuah chuan ka lo la hlawh tlem hle a, ka mipa chanpui hlawh lak zaa 10 vel chauh min lo pe a ni," a ti.

Hmeichiate hlawh tlem zawk pek chungchang hi sawi chhuah a lo ni fo tawh a, Oscar-ah khan Patricia Arquette chuan mipa leh hmeichhia an intluktlang lo tih a lo sawi chhuak tawh a, May thla khan Charlize Theron chuan Snow White and the Huntsman chhunzawmna turah a mipa chanpui, Chris Hemsworth nena hlawh inzata chan a lo phut tawh bawk.