Billboard 200-ah Playboi Carti bawk chungnung ber

Billboard 200 album chart thar berah Playboy Carti album 'MUSIC' chuan a kar hnihna atan pakhatna dinhmun a hauh chhunzawm leh. Carti album thar hi a kar hmasa aiin album sales 56% in a tlahniam a, mahse heti chung hian chart thar ber a la thunun chunzawm thei a ni.

Carti album zinga pakhatna hauh thei pahnihna leh kar hnih chhung No 1 ni thei album a neih hmasak ber, 'MUSIC' hian a kar hnihna, kar hmasa chhung khan equivalent album unit 131,000 a hmu chhuak leh thei.

Chart tharah hian Selena Gomez leh a pasal hual Benny Blanco-te thawh dunna album 'I Said I Love You First' chu pahnihnaah awmin equivalent album unit 120,000 chu tlangzarh karah an nei chhuak nghal a ni. Pathumnaah hian hun eng emaw chhung chart-a lo lang tawh, No.1 pawh lo ni tawh Kendrick Lamar 'GNX' chu awmin equivalent album unit 65,000 a nei a, a hnuai chiahah hian PARTYNEXTDOOR leh Drake kut chhuak '$ome $exy $ongs 4 U' chu equivalent album unit 61,000 neiin palina a hauh pha bawk. SZA album 'SOS' chuan equivalent album unit 60,000 neiin Top 5 a rawn khar.

Album chart tharah hian Sabrina Carpenter, Lady Gaga, Bad Bunny, Tate McRae, leh Morgan Wallen-te an rawn lang leh a, anni hi hun eng emaw chen chu chart-ah hian an cham tawh a ni.