GIG Motors-in 2024-2025 ah lirthei 2,350 hralh

Mizorama Maruti Suzuki dealership GIG Motors chuan 2024-2025 financial year chhungin lirthei 2,350 hralhin, sorkarah chhiah cheng vaibelchhe 54 chuang an chhung lut tih an tarlang. GIG hian 2024 Youth Icon runner up Peter Lalnunpuia’n car thar a dawn theih nan Rs 1,00,000 thawhin, Peter-a fan-te pawisa thawh tlingkhawm nen Wagon R an hlan bawk.

Thawhṭanni zan khan Edenthar-a an showroom-ah 2024-2025 Financial Year Closing Programme hmangin, hetah hian kum khat chhungin chhiah (tax) Rs vbc 54.72 sorkar-ah an chhunglut niin an tarlang. Kum khat sum chevel (annual turnover) hi 2024-2025 chhungin Rs vbc 278.93 a tling a, an chhiah pek hi chawhrualin thla khatah Rs vbc 4.56 ang vel zel a ni

GIG Motors hi 2017 aṭangin Maruti Suzuki dealership an ni ṭan a, March 2025 thlengin an showroom hrang hrang aṭangin car 17,244 an hralh chhuak tawh a, Mizorama car hralh chhuak hnem ber an ni. Arena, Nexa leh Commercial Vehicle tan showroom hrang ṭheuh neiin, heng showroom hrang hrang aṭanga an lirthei hralh chhuah belhkhawm chu 2023-2024-ah 3,215 tlingin, 2024-2025-ah 2,350 an hralh ve thung.